Mizoram Journalist Association (MJA) Champhai District Press Club, Champhai Bethel Veng a mi chu vawiin chawhnu khan Law and Judicial Minister Pu TJ Lalnuntluanga chuan a hawng.

Hawnna puala inkhawm buatsaihah Pu TJ Lalnuntluanga chuan MJA Champhai District Annual Conference leh Press Club hawnna hun tha tak neih a ni  thei chu lawmawm a tih thu a sawi a. Champhai tana hmalakna hrang hranga MJA the finchhuah thinnaah lawmthu sawiin, Chanchinbumite chu sawrkar tha tichaktu leh khalh ngil thei pawl pawimawh tak an ni a, an zahawmna chu mimal nunah thui tak a innghah avangin invawng leh nun uluk taka  an hman thiam a tul thu a sawi a.  Mizoram chu ram thang leh hmasawn mek zel anih avangin mipuite rilru sukthlek herdanglamna turin mipuite  hnena hmasawnna thlen leh hriatzauna pek thin angai a,  MJA Member-te chu mipuite zirtirna leh insiamthatna lamte  hrilh hnem tura tan la lehzual tur leh  mahni ngei penchhuaka thu dik leh ziktluakte mipui hnena chhawpchhuah tum turin a chah a ni. 

Ram leh hnam tana rawngbawl kawngah Chanchinbumite tawiawm leh finchhuahna vanga hmalakna hrang hrangte chak taka kalpui mek zel anih thu pawh sawiin, Indo-Myanmar Border trade chungchangah  sawrkar laipui dawra hmalak zel a ni a,  Immigration Check Post peihfel tep a ni a, Land Custom Station aia lian zawk Integrated Check Post siam tuma hmalak zel ani bawk a, hei hian zofate inpumkhatna leh zalen zawka inkalpawhna mai bakah   insumdawntawnna a thlen thei dawn a ni, a ti a.  Sawrkarin inkalpawhna tha awm theihna turin hma a lak mek thu sawiin,  tun atanga hun reiloteah Khawzawl leh Champhai inkar siam tum niin, Keifang leh Kawlkulh inkar siam mek zel anih thu leh Seling-Champhai double lane a siam turin  chak taka buaipui a ni, a ti a. Khawpui mumal leh felfai zawk din theihna turin Champhai Master Plan mumal tak pawh tun atanga hun reiloteah duanfel tum anih thu leh  Road Safety mumal tak bakah Building regulations nei hmasa ber nih tuma tanlak anih thu  a sawi a. Champhai khawpui tuamchhuaka Ring Road siam tur pawh chak taka bawhzui mek niin, mamawh thulha mipuite awlsam leh rang zawka an veivah zung zung theihna turte pawh ngaihtuah a ni, a ti bawk. 

Minister chuan a enkawl department hmalakna thar turte tarlangin, boruak bawlhhlawh veng turin Aizawl leh Lunglei ami bakah District Transport Office (DTO) awmnaah Pollution Test theihna khawl bun tum anih thu sawiin, Champhaiah pawh thla hnih khat chhunga bunfel hman tum anih thu leh Champhaiah Mizoram hmun dangte tana entawn theih turin Botanical Garden siam tum anih thu a sawi a. Zofate inpumkhatna turin Aizawl-Churachanpur, Aizawl-Jampui, Champhai-Tahan inkar Bus service siam tum niin, a tul ang zela inrawnkhawma neih anih thu a sawiin a t5aka kalpui thuai tum a ni, a ti a. MJA Champhai District hruatu thlan tharte lawmpuina hlanin Champhai Distriuct MJA te kalzelna turah duhsakna  a hlan a ni. 

Thusawitu dang MJA Champhai District President Pu C.Lalhnunpuia chuan Chanchinbumite chu mipui siam sawrkara fawng chelhtu pawimawh tak, sawrkar kalphung leh hmalaknate mipuite hnena a tha zawnga puangdarhtu an ni, a ti a. Mipui hnena chanchin thar dik leh rinawm tak an chhawr tangkai leh hmasawnpui theihna  tur puangtu an nih avangin sawrkar pawhin nasa lehzualin hmang tangkai thiam se a duh thu a sawi a. Champhaia sawrkar hnathawk fawng chelhtute chu  Champhai awm chhunga  nakin zel pawha chhinchhiahtlak tak tur  damlai lung hnutchhiah tum turin a ngen a. Law Minister Pu TJ Lalnuntluanga thahnemngaihna leh hnathawh duh tak takna thinlung chu fakin khawtlang leh ram tana rotling hnathawh kawngah tanrualpui zel a tul thu a sawi bawk. 

Press Club hawnna hun hi Pu R.Lalfakawma, Vice President chuan a kaihruaia. Gen Secretary Pu C.Lalrinsanga hnen atangin report ngaihthlak anih hnuah Pu Lalhlupuia, Information Secretary-in technical report a pe a. Pu Lalhmingmawia Pachuau, EM in lawmthu sawina hun hmangin hun a khara,   Press Club thar lawmna ruai theh a ni. Press Club hawnna hunah hian Bawrhsap mawhphurhna la mektu Pu Mark Lalthanliana, Addl DC; Pu Rex Zarzoliana Vanchhawng, SP leh Champhai District chhunga Head of Office-te; Aizawl lam atangin  Pu R.Lalrammawia, Director, Transport Dept;  MJA General Hqtrs atangin President Pu Zonunsanga Khiangte,  Vice President Pu Lalremsiama leh member dangte an rawn tel  a ni. 

Champhai District MJA Press Club hawn tak hi cheng nuai 40 senga sak a ni a, Mizo pa chhiara chawng li niin, a dung feet 55 leh a vang feet 26 a zau a ni. Vawiin chawhma lam khan MJA Champhai district chuan Annual Conference hmangin pawl tana thil pawimawh hrang hrangte relin, chawhnu lamah kum 2020-2022 chhunga an pawl kaihruaitu tur  thlanna an nei chhunzawm a. He inthlanna hun hi MJA General Headquarters atangin President Pu Zonunsanga Khiangte leh a thawhpuiten an rawn neihpui a. President-ah Pu Lalhmingmawia Pachuau thlan tlin a ni a, Pu Lalhlupuia chu Vice President a thlan niin, Pu Lalhmingliana chu Treasurer tura thlan a ni. Heng bakah hian Executive Committee member tur 5 thlan chhuah an ni bawk.