Vawiin khan Tourism Minister Pu Robert Romawia Royte chuan Reiek tourist resort-a zokhua leh adventure park a hawng a. Zin mite hip nana Reiek Tlang cheibawlna tur mamawh zualpui siambelh a nih theih nan lungphum a phum bawk. He hunah hian Road and Infrastructure Development Board Vice Chairman Er.H.Lalzirliana, MLA, bakah Sports, Youth Affairs and Tourism Board Vice Chairman Pu TC Pachhunga ten Minister hi an tawiawm. Mizoram Chief Secretary Pu Lalnunmawia Chuaugno chuan zinmite hipna tur Sawrkar hmalakna pawimawh hawnna inkhawm hi a kaihruai a ni

Pu Robert Romawia Royte chuan zokhua, adventure park leh a kaihhnawih hrang hrang hawnna programme ah thu sawiin Reiek chu zinmite hipna hmunpui, ram dang mite hriat hlawh khawpa cheibawl tum a nih thu a sawi a. Tourist destination tak taka siam tur hian sawrkar mai bakah Reiek khawtlang mipuiah a hlawhtlinna a innghat thui hle tiin sawrkarin ruhrel chi hrang hrang a dinte duat turin a chah a ni. Zokhua chu hun eng nge maw chen mipui hman theihin awm tawh mahse project-in a ken tel thil tam tak siam belh a nih avangin dan ang taka hawn a nih mai loh thu a sawi a. Adventure park leh intihhlimna hmun dangte zawh fel a nih hnuah mipuite hman tangkai theih tura hawn a ni ta chu lawmawm a tih thu Minister chuan a sawi. 

Tourism Minister chuan Adventure park leh zokhua hawn tak te bakah Reiek Tlang leh a chhehvel cheibawlna tur cheng nuai 560 senna tur lungphum phum a ni leh ta te chu Mizorama tourism hmalakna danglam leh chhinchhiahtlak tak a ni, a ti a. Tunlai khawvel changkang zelah mipuiin hlimna leh chawlh hahdamna hmun tlawh te an uar chho zela, chutiang ang dawng sawng thei tur chuan Tourism Department inbuatsaih a ngai tih sawiin, Mizoram chhunga hmun mawi kan neihte khualzin hip nan hman tangkai dan kan thiam a tul a ni, a ti.

Er H. Lalzirliana, MLA, Road and Infrastructure Development Board Vice Chairman chuan Mizoramin Reiek Tlang kan nei kan vanneihzia sawiin India ram hmun dangten tourism an chhawr tangkai angin kan la chhawr ve ngei dawn, a ti a. Reiek khua te an vannei hle tiin neitu thinlung puin mikhual dawnsawn dan te thiam turin a fuih a, mipuiin eizawnna tha tak atan kan la hmang thuai dawn, MLA chuan a ti.

He huna thusawitu dang Sports, Youth Affairs and Tourism Board Vice Chairman Pu TC Pachhunga chuan Reiek tlang hmunhma leh ram te, nungcha leh thing leh mau humhalh a tul thu leh faina kawngah khaw entawntlak tak an nihna chu chhunzawm a, fai leh thianghlim uar zel turin a chah a ni.

Tourism Minister in a hawn tak project hming hi Development of Adventure and Eco-Tourism at Reiek, Mizoram and Development of Adventure Theme Park tih a ni a. Sawrkar laipui Ministry of Tourism hnuaiah Swadesh Darshan Scheme atanga thawh a ni. Cheng nuai 1350.37 senna he project hi October, 2017 khan thawh tan a ni a, August ni 25, 2019 ah zawh fel a ni. Adventure park-ah hian high rope course, zipline, shooting range, climbing wall, tarzanland, spider web, Austrian trolley leh body zorbing te a awm a. Zipline hi hmun thumah dah niin a sang zawk pahnihte hi meter 220 zeta sei a ni a, a hnuai zawk hi meter 150 a sei a ni thung. 

Reiek tlanga ruhrel mamawh zualpui - mihring kalna, lirthei dahna, inthiarna, street light, khawthlirna hmun, amphitheatre chei thatna, retaining wall leh pawimawh dang siamna tur atan North East Special Infrastructure Development Scheme (NESIDS) Component - I, cheng nuai 560 senna tur lungphum chu vawiin khan Tourism Minister Pu Robert Romawia Royte chuan a phum nghal a ni.

Vawiin programme hi Mizoram Chief Secretary Pu Lalnunmawia Chuaungo chuan a kaihruai a. Tourism Director Pu V Lalengmawia'n technical report a pe a, Tourism Commissioner and Secretary Pi Esther Lalruatkimi’n lawmthu sawiin hun hnung a khar. ICT Secretary Pu Amjad Tak, Women and Child Development Director Pi Vanlalpianpuii bakah Reiek BDO Pu Ngurthansang leh Reiek khawtlang hruaitute pawh he hunah hian an tel a ni.