Vawiin khan Hotel Floria Conference Hall, Aizawl- ah Joint Electricity Regulatory Commission for Manipur and Mizoram chuan Power & Electricity Department in kum 2020-2021 sawrkar kum chhunga kawlphetha chhit man hman tur chungchangah mipuite ngaihdan lakhawmin Public Hearing a nei. Kawlphetha chhit man (electric bill) thar hi April ni 1, 2020 atanga hman tan tura ruahman a ni.

Nimin February, ni 27, 2020 khan Mizoram a kawlphetha chungchang ngaihtuahtu Committee sang ber State Advisory Committee chuan Kawlphetha chhit man (electric bill) thar hi a lo ngaihtuah tawh a, he Committee ah hian NGO lian tak tak Central YMA, AMFU, Mizoram Upa Pawl, Mizoram Consumer Union, etc. ten an sawi ho a ni. Committee chuan kawlphetha chhit man tihsan chu awm tiin, mipuite tan a hautak lutuk lo turin a rate erawh chu siam ni se a ti a ni.

Vawiin Public Hearing neihna tur hi Mizoram a mizo tawng leh saptawng chanchinbu ah te tarlan niin mipuite kal tur a hriatttirna tihchhuah a ni a, he Public Hearing a mipuite ngaihdan hi Commission in a ngaipawimawh em em a, kawlphetha chhit man tihsan chungchangah pawh mipuite ngaihdan hian awmze thui tak a nei thin a ni.

He Public Hearing hi Electricity Act, 2003 hnuaiah kawlphetha chhit man tihsan a nih dawn a tih ngei ngei tur a ruat a ni a, hei hi Joint Electricity Regulatory Commission for Manipur and Mizoram pawhin kum tin a zawm ziah thin a ni.