Vawiin khan Young Mizo Association Chite Veng Branch chuan Silver Jubilee (1995-2020) lawmna hun Chite Veng In pui ah an nei a, Tourism Minister leh Bialtu MLA ni bawk Pu Robert Romawia Royte chu Khuallian a ni a, AMC Mayor Pu PC Lalhmingthanga chu Khualzahawm a ni.

Khuallian Pu Robert Romawia Royte chuan thu sawiin, YMA Chite Veng Branch Silver Jubilee lawmnaa sawm a nih chu lawmawm a ti a. Hemi hun hmang tura Central YMA aiawha lokal Pu Fabian Lalfakawma hnenah pawh lawmthu a sawi bawk a ni. Khuallian chuan YMA Chite Veng Branch in Kum 25 a lo tlin hian hruaitu hmasa te leh bul lo tan tu te hriat reng a pawimawh thu leh mimal ang pawha chawimawi an phu a tih thu a sawi a. YMA Chite Branch chuan Silver Jubilee chu YMA anga hmasawnna tur awm te leh hmalakna tur ngaihtuahna hun atan a hmang turin a fuih a, Silver Jubilee hian YMA in khawtlang tana tha leh zung a thawhna ti chak leh zual bawk se a duh thu a sawi bawk a ni. Khuallian chuan YMA chu Kohhran, chhungkua leh mimal tana pawl tangkai ber a ni a, YMA tel lo in khawtlang a kal thei lo a ni, tiin a sawi a. YMA Chite Veng Branch Silver Jubilee chuan pawl dang te nena thawhhona tha chhuah zel turin duhsakna a hlan a ni.

He hun hi YMA Chite Veng Branch President Pu C.Lalzawmliana'n a kaihruai a, Jubilee Zaipawl leh mal zai ngaihthlak a ni a. Hruaitu hlui mi 29 hnenah chawimawina hlan a ni bawk a ni.