Vawiin khan Directorate of Science & Technology hnuaia awm Mizoram Science, Technology & Innovation Council chuan National Science Day 2020 lawmna ATI Auditorium, MINECO ah an buatsaih a, he hun hi Planning & Programme Implementation Secretary Dr. C Vanlalramsanga leh Prof. R. Lalthantluanga, MZU Vice Chancellor lo ni tawh thin ten an hmanpui a ni.

Khuallian Dr. C. Vanlalramsanga chuan MISTIC in he hun dechhena Science lamah Ph. D degree nei Mizo hmeichhe 86 lai chawimawina an hlan chu lawmawm tiin Mizo hmeichhe te khawvel huap pawhin an duai lo hle tiin an thiamna leh theihna te chu Mizoram hmasawnna atan hmang tangkai turin ngaituahna sengin tih tak zeta hma la turin a fuih a. A thusawi ah khawvel huapa Science leh Technology lama hmeichhia te dinhmun tarlangin, heng chanchin atangin Science lamah Mizo hmeichhia ten dinhmun chu tha thawkhatin a chhuanawm hle ni a lan thu a sawi.

Dr. C. Vanlalramsanga chuan science tih hian rocket te, nuclear bomb te rilru a lang mai thin a mahse kan nitin nunah leh kan khawhsak ziaa Science leh a thil siam kan hmang nasa em em a, research atangin a taka hmanna a chhuah nasat chuan hmasawnna a tam thei zawk a, chutiang pratical application awm thei turin an research te hmang tangkai thiam turin Mizo hmeichhe thiam te chu a chah.

MZU Vice Chancellor chawl tawh Prof. R. Lalthantluanga chuan Science kaihhnawih hnaa khawvel huapa, hmeichhia te an tlem ngaituahin an thawhhlawk dan te sawi a, mipa leh hmeichhia in enhranna ‘gender bias’ te hi Science ah te chuan tih bo a tul hle niin a sawi bawk.

National Science Day lawmnaah hi Dr. R.K. Lallianthanga, Chief Scientific Officer in kaihruaiin, Pu Samuel Lalmalsawma, Senior Scientific Officer, MISTIC hnen atangin Report ngaihthlak niin Dr. Lalchhandami Tochhawng, Scientific Officer, MISTIC in thupui sawizauna a nei a ni.

Kumin National Science Day hi ‘Women in Science’ thupui neia hman niin Mizo hmeichhe, Science lamah Ph. D degree nei hmeichhia 86 te chu a bika chawimawina hlan an ni. National Science Day pual Essay inziahsiakna neih a lawmna la te pawh he hunah hian lawmman hlan an ni bawk.

Mizo zinga M.Sc. degree nei hmasa ber chu Dr. L.N. Tluanga niin M.Sc. (Mathematics) hi 1959 khan a zo a. Hmeichhia zinga M.Sc. degree nei hmasa te chu - Pi Rokimi 1960/61 chhoh a M.Sc.(Anthropology) degree nei leh Pi Lalnipuii 1964 ah M.Sc. (Chemistry) degree nei te an ni a. Mizo hmeichhe zinga Science lamah Ph.D. degree nei hmasa ber chu tunah Horticulture Director ni mek Dr. Saipari a ni.

National Science Day hi Fenruary ni 28, 1987 atangin ram pumah lawm a ni thin a. Physics a Nobel Prize latu India mi hmasa ber Dr. C.V. Raman’n February ni 28, 1928 a Raman Effect a hmuhchhuah ni hriatrengna ni a ni.

Mizoramah chuan ‘National Science Day’ hi kum 2006 atanga khan hmang tan niin Astronomy Camp, Mock Parliamentary Show, Science Awareness Campaign, Nature Study, Essay Competition, Science Exhibition, Exposure Tour te huaihawt a ni tawh thin a ni.