Tukin zing khan Kawnpui-ah Pu Gaston Vanlalhriatpuia, SDO(C) Kawnpui chuan Cleanliness Week, 2017 a hawng a; mahni in leh a vel tifaiin Chhungkaw hnatlang neih nghal a ni. 

Faina Hapta hawnna inkhawm tawi hi zing dar 7:00-ah Awithangpa Hall kawtah SDO(C) Kawnpui kaihhruainain hman a ni a; India hnam pa Mahatma Gandhi hriatrengna atana he hun hi kum tina buatsaih thin a nih thu leh a kharna hun hmannaah pawh lawmman la ngei thei tura inbuatsaih theuh turin kalkhawmte a sawm rualin Cleanliness Week 2017 a hawng nghal bawk. 

Pu R. Lalzawmliana, Kawnpui Joint YMA President chuan, Kawnpui-ah kum 2005 atanga Faina Hapta hman tan a nih thu sawiin, kum tina inelna buatsaih thin - Veng fai, Office fai, School fai leh Hotel/Restaurant fai inelna buatsaih leh a ni a, Zirlai naupangte tan Faina lam hawi Essay Writing Competition a awm bawk ang a ti a. Mizoram puma khawpui 23 te fai inelna neihah School leh veng thenkhat hma la tha tawklo an awm erawh tan lak a ngaih thu a tarlang tel bawk. 

Pu K Laldawngliana, Kawnpui Joint VC Chairman chuan, Khawpui fai inelna endik a nih laia School leh a panna kawng te, vantlang hmun thenkhata bungraw dahhnawk la awm te chu School leh VC ten hma an lak that tawk loh vang a nih a rin thu a sawi a; kum lehah chuan a aia nasa zawka VC leh School te pawhin tan lak a tul tawh a ni tiin, Faina Hapta kumtin hman thin nimahse, engtiklai pawha Faina Hapta hmang reng turin kalkhawm te a chah bawk. 

Cleanliness Week Committee-in alo rel tawh angin, vawiin hian Kawnpui Sub-Division chhungah mahni in leh a vel tifaia chhungkaw hnatlang nei vek tura ngen an ni a; Chhungkaw hnatlang nei leh neilo te hi Branch YMA hnuaia Section tinte chu an mahni huam chhung theuh endik a, report thehlut leh tura tih an ni. Naktuk atangin Village Council hrang hrang te chu khawtlang hnatlang nei tan nghal tura hriattir an ni bawk.