Tukin zing dar 7:00 khan Urban Development & Poverty Alleviation Department hmalaknain Faina Hapta hawnna inkhawm Serchhip Bazarah neih a ni a, Pu Chuauhnuna, MCS Deputy Commissioner chuan khuallian niin a hmanpui a, zirlai naupangten Serchhip Bazar chhim leh Hmar lam atangin faina thutiam neia au rualin kawng an zawh bawk a ni. 

Khuallian Pu Chuauhnuna, MCS Deputy Commissioner chuan thusawiin thingtlang kilkhawr zawka chengten zirna kawngah te, damdawia in enkawlna kawngahte leh thil dang dangah harsatna an tawh fo laiin khawpuia chengte chuan zirna kawng awlsam zawk, damdawiin tha leh a panna awlsam zawk leh mamawh leh chakkhai dapna pawh awlsam zawk kan nei hi kan vannei hle ani a ti a, kan vanneihna chanah hian lawm nachang kan hre tur a ni a, lawmthu kan sawi theihna kawng awlsam tak chu faina kawnga theih tawp kan chhuah hi ani a ti a. Kan thinglungah faina hi in tuh nghet tlat se a duh thu sawiin he Faina Hapta hi a hawng a ni. 

Pi Vanthangpuii, District Urban Development Officer chuan report pe in Serchhip ah hian kum 2003 atangin faina hapta hi hman tan niin kum tin hman thin a ni a ti a. India sawrkarin Swachh Bharat Mission hmangin chak takin Faina kawngah hma a la mek a, Serchhipah pawh District Sanitation Task Force din niin an kaihhruaina hnuaiah hian Village Council area hrang hrangah Village Level Sanitation Committee te pawh din niin faina kawnga hma kan sawn nan tan lak mek zel a nih thu leh Kumina Faina Hapta denchhena Veng fai inelna neih anih tur thu a sawi bawk. 

He hun hi Pu R. Sanghmingthanga, President Sub-headquarters YMA Serchhip chuan a kaihruai a, sawrkar department hrang hrang aiawhte leh zirlai naupang thahnem tak an tel a ni.