1383/2022-2023
Champhai, the 27th July, 2022: P&E Department, Champhai buatsaihin India ram zalenna kum 75-na tlin lawmna, Azadi Ka Amrit Mahotsav pualin vawiin chawhnu khan Kawlpetha Kûtpui, Khawbung BRC Conference Hall-ah hman a ni.

Khuallian P&E SE Champhai Pu Lalchhanhima chuan kawlphetha chu tunlai mihring khawsak kawng tin renga tangkai a nih tawh avangin kawlphetha tel lovin mihringte tan khawsak ngaihna a awm tawh lo a ni, a ti a. Nizung chakna hmanga kawlphetha siam chu a thianghlimin a tangkai a, mimal ang pawha hmalak theih a nih thu sawiin, kawlphetha renchema mamawhna takah tangkai taka mipuite chu hmang thin turin a ngen a. East Lungdar atanga Khawbung meieng pekna tur kawphetha hruipui 33 KV Line chu siam mai tura ruahmanna kalpui mek a nih thu a sawi bawk.

He hun hmanpuitu Khawbung BDO Pu K. Lalhlimpuia chuan an bial chhunga P&E Department ten hun an hmang chu hlawkthlak a tih thu leh lawmawm a tih thu a sawi a ni.

India rama kawlphetha thlunzawm kual vek chu khawvela kawlphetha thlunzawm zau ber a nih dante Powergrid Chief Manager Pu AK Baruah, District Nodal Officer ni bawk chuan sawiin, India chu thingtlang kawmkil thlenga kawlphetha thlun zawm vekna ram a nih avangin ram ropui a nih thu a sawi bawk.

Kawlphetha Kutpui-ah hian kum 2047 a hnianghnar taka power sector-a India ram a intodelh theih dan tur tinzawnin kawlphetha hmanga India tih-ên leh hmalam hun tih-ên 'Ujiwal Bharat Ujiwal Bhavishya, Power @2047' tih thupui hmangin India rama kawlphetha chhit tawh dan leh hmalak zel tum dante tarlan a ni.

Mithiamten mipui hriat tur pawimawh zirtirin Khawbung RD Block huam chhung khaw hrang hrang kawlphetha hmangtuten kawlphetha an hmuh theihna atana hmanraw hrang hrang an dawnte leh an hman tangkai dante an sawi a. Pu K.C Dala, SDO Rural, P&E Champhaiin zirtirna a pe a. Inzirtirna lam hawi film-te thlirho a ni bawk a. A thlawna kawlphetha thlunzawm free connection tihsakten thu an sawi bawk a, Pu K.Lalhlimpuia, BDO Khawbungin lawmthu sawiin hun a khar a ni.