Champhai District Bawrhsap Pu Vanlalngaihsaka  IAS hovin  vawiin  khan Tuipuiral Zirlai Pawl (TZP)-te huaihawt Education & Moral Awareness Campaign chu Khawbung Community Hall ah  hman a ni.

Zirlai kal khawmte chu tum mumal nei tur leh All India Service-a luh tum  tur a fuih in  Khuallian Pu Vanlalngaihsaka chuan leh heng service hi India rama Mizote hmel ti mawitu  an ni a,hranghlui leh mi hmasa te kawng lo zawh tawh hi thangthar ten  zui ve a ngai a,State pawn lama Mizo officer awmten Mizo zirlaite tan tangkaina an ngah tiin  hetiang Campaign hman a ni hian rah tha tak a chhuah a beisei thu a sawi.

TZP President Tv. Vanlalsailova chuan Education & Moral Awareness campaign buatsaih a nih dan sawifiahin kumin 2017 HSLC Result-ah Tuipuiral huam chhunga High School tam zawk result a tlak hniam avanga buatsaih an nih thu leh zirtirtu indaih loh avanga zirlaite’n zirnaa harsatna an tawh dan a tarlang a, hmasawnna atana an mamawh te sawi langin sorkar leh khawtlang puihna  an mamawh thu a sawi nghal bawk.

Tuipuiral huam chhunga Pawl 10 leh 12 zirlaite pualin  he hun hi Tuipuiral Zirlai Pawl (TZP)-te chuan an buatsaih a niin he campaign atana sum senso hi Pu C. Vanlalvena MPS (Retd.)-in a tum sak .TZP Gen. Secy Tv. Lalzoênga hnen atangin report ngaihthlak a ni bawk.

Resource person Pu CC Lalchhuangkima, Addl. DC leh Pu Lalremruata Kullai, MCS, Champhai District Election Officer te  thu sawi ngaihthlak a ni a. Heng bakah hian Pu C Vanlalvena MPS Retd., Deputy DPC Pu C Hualrikhuma leh Khawbung VCP Pu F. Vanlalriana te’n thu an sawi bawk.

He Campaign ah hian Tuipuiral huamchhunga High School leh Higher Secondary School te atangin zirlai 506 leh zirtirtu 37 an tel thei a ni.