1841/2023-2024

Khawzawl, 12th September 2023: Khawzawl District chhunga khaw pakua - Khawhai, Sialhawk, Tlangmawi, Tlangpui, Chalrang, New Chalrang, Vangtlang, Riangtlei, Lungtana SEDP thawh hnihna dawngtu tur te pualin vawiin khan Khawhai Town Hall-ah Awareness Campaign neih a ni a. He hun hi Khawzawl Addl DC Pu Lalfakzuala chuan a kaihruai a, SEDP Line Department aiawh ten an telpui bawk a ni.

Khawzawl Additional DC Pu Lalfakzuala chuan sawrkarin hripui leng vangin sum harsatna a tawk a, heng harsatna kara SEDP sem theih a ni tur chu a lawmawm hle a ni, a ti a. September thla chhungin SEDP thawh thumna (Phase III) dawngtu tur te pawh thlan chhuah an nih tur thu sawiin; SEDP dawngtute chu tha taka thawk turin a chah nghal a ni.

District Level SEDP Committee Member Pu H. Lalrozama pawhin he hunah hian thu sawiin SEDP hnuaia sum hmuh te chu a nihna tur ang taka hman a pawimawh a ti a. Chhungkaw hmasawnna atana hmang theuh turin kalkhawmte chu duhsakna a hlan a ni.

He hunah hian Line Department hrang hrang - Commerce & Industries, Sericulture, UD&PA, Agriculture, Horticulture, AH&Vety leh Fisheries Department aiawh ten thu sawiin, SEDP dawngtute fuihna leh trade hrang hrang kalphungte zirtirna hun an hmang bawk a ni.

SEDP thawh hnihna hi Khawzawl District, Tuichang AC huamchhunga chhungkaw 1552 te hnenah pek tur a ni a. State Level SEDP Executive Board Committee in thu a dah angin SEDP thawh thumna dawng tur te chu khaw tin Village Level SEDP Committee in an lo ngaihtuah ang a, September ni 20,2023 hma in an thlang fel dawn a ni.