Hmeichhia leh Hmeichhe naupang te venhimna beihpui thlak Beti Bachao Beti Padhao (BBBP) Serchhip District hmalakna kal zelah vawiin hian Khawlailung playground ah Hockey Exhibition Match cum Skill show talent search neih ani.

Khawlailunga hmeichhe naupang, Hockey lama talent nei thate zawnchhuahna programme ah hian Pi Lalrampari, Thenzawl Hockey Academy Coach chuan thusawiin, Serchhip District chhungah Hockey zirna tha tak mai a awm laiin, zirlai tam zawk chu District dang atanga lut an ni hlawm a. Academy awmna District naupangten an hmang tangkai tawk lo tih a sawi a. Infiamna lamah Mizo hmeichhiaten theihna sang tak kan nei tih hriain kan theihna hailan kawngaha nasa zawka kan beih sauh sauh a tul a ni, a ti a. Hmeichhe naupangte hamthatna tura sawrkarin BBBP scheme Serchhip District tana a ruahman chu lawmawm a tih thu sawiin Khawlailung atang pawhin Hockey zirna School-ah a tam thei ang ber luh tum turin a sawm nghal a ni. Pi Lalrampari, Thenzawl Hockey Academy Coach hi BBBP Serchhip District Local Champion-ah puan a lo ni tawh a ni.

He hunah hian V. Lalruatsangi, Women Welfare Officer, BBP Serchhip chuan Khawlailung Games & Sports hruaitute hnenah hian Hockey Stick 13 leh Ball 4 a hlan nghal bawk a ni.

He hun kaihruaitu Pu Lalnunzira Sailo, Vice President Khawlailung GSA chuan he hun pawimawh tak mai Khawlailunga buatsaih a ni chu lawmawm a tih thu leh khawtlang huap pawha tan lak thar a ngaih thu a sawi.

Beti Bachao Beti Padhao (BBBP) Scheme hi Ministry of Women and Child Develoment hmalakna niin a scheme in a tum ber chu hmeichhe naupangte venhim leh zirna lama chher puitlin a ni. India ram chhung district hrang hrangah kalpui niin Serchhip district ah pawh tunah hian kalpui mek a ni a. Hmalakna tam tak zinga pakhat, Hockey lamah hmeichhe naupangte theihna zawnchhuah runpui chu tunah hian neih mek a ni. Khawlailung bakah hian E. Lungdar-ah te, Lungpho-ah te pawh he programme hi kalpui zui zel tur a ni ang.