Vawiin chawhma khan District TB Centre Conference Hall, Lunglei ah World TB Day hman ani. Dr. Thani Pachuau, Chief Medical Officer, Lunglei chuan khuallian niin a hmanpui. Kumin thupui ah It's Time (A huntawh) tih hman ani.

World TB Day hmanna hun hi Dr.Lalrintluangi, Senior Medical Officer, Lunglei in kaihruaiin Dr. Thani Pachuau chuan TB  natna hi khawvela thihna thlentu 10 thlanchhuah zingah pakhat a ni a, hemi anih avangin  India ram pawhin  kum 1962 atangin TB dona hi   kalpui  tawh in Mizoram ah pawh TB hi natna tlanglawn a anih avangin kan do a ngaih thu  a sawi. TB vei nisi la inhrelo tam tak an awm a ringa heng te hian a sawichhuahna hmun TB Centre pan turin a chah ani. Ram changkangah chuan nat lohna turin an inveng lawk thin a, keini Lunglei District mipui te pawhin  kan hrisel zawkna turin lo inven lawk a, mithiamzawk te rawn a pawimawh thu a sawi. TB natna vei te hi thlarau leh tisa ah tanpui an ngai em em a chuvangin thiantha leh a khawtlang ang zawng pawh in  tanpui thin tur a ni a ti bawk. RNTCP hi  hriselna kawnga hmalakna ah chuan Programme thatak niin Health Dept. chauh hian hriselna kawnga hmalakna hi a ti hlawhtling thei lova, Dept. hrang hrang nena thawh ho a ngaih thu a sawi bawk. ASHA worker te pawh khawtlang tana an in pek angin thahnemngai taka vantlang tana thawk a, programme hrang hrang te zir peih turin a chah ani.

Dr. LC Liana, District TB Officer, Lunglei in report pein khawvel mihring cheng 1/3 te hi TB hrik pai kan ni a,Lunglei ah  kum 2018 ah TB vei 221 awmin kum 2019 ah 55 an awm a. Lunglei District ah TB vei leh vei lo inentirna hmun 4 awmin chungte chu District TB Centre, Lunglei, Christian Hospital, Serkawn, Tlabung Hospital leh Hnahthial Hospital te an ni.