Urban Development & Poverty Alleviation Department buatsaih District Capital hrang hrangte faina kawnga inelna kal mek leh District chhunga Town hrang hrang te inelna kal mekah nasa takin Serchhip a inbuatsaih chho zel a. Inbuatsaihna hian a vawr tawp a thleng chho tan tawh a ni.
He intihsiaknaa hmalak dan tur sawi hovin Serchhip DC Pi Sangchhin Chinzah ruahmanna in ni 30, August ah khan Serchhip DC Conference Hall ah khawpui chhunga tlawmngaipawl aiawh zawng zawng, Village Council member zawng zawng leh sawrkar Department aiawhte meeting an nei a. An thurel angin September thla tir atangin Serchhip khaw chhunga chhungkaw tinin an in leh a vel tihfai hna an thawk tan a, kohhran zawng zawng leh zirna in te, office te pawhin an hmunhma theuh tihfai hnatlang an neih leh theuh hnuah, khawtlang huap hnatlang village Council hrang hrang ten an nei chho leh bawk a. Tunah hian Village Council huap hnatlang te pawh thawh zawh thawkhat tawh niin, naktuk Inrinni ah Village Council pahnih velin hnatlang an nei leh ang a. Khawtlang huap inbuatsaihna chu zawh thawkhat a ni taw hang.
He intihsiakna atan hian Village Council, YMA leh zirna in ten tan an la nasa in tha an thawh hlawk hle a, vawiinah pawh Presbyterian English School leh School thenkhat a zirlai leh zirlai nu leh paten an zirna in hmunhma tihfai hnatlang an thawk hlawm a ni.
