Vawiin Chawhma khan khawvel pum huapa Ruihlo Hmansual leh Ruihlo Tawlh Dona Ni chu Sawrkar, Tlawmngai Pawl leh Ruihlo donna kawnga hmalatute tangrual chuan programme phuisui tak siamin Dawrpui Multipurpose Hall-ah an hmang. He hun hi Social Welfare Minister Dr. K. Beichhua chuan khuallian niin a hmanpui a. International Day Against Drug Abuse & Illicit Trafficking hi kumtin June 26-ah kum 1986 atang khan hman a ni naiin Mizoramah chuan hun remchang zawk dapin vawiin khan hman a ni ta zawk a ni.

Ruihlo Hmansual leh Ruihlo Tawlh Dona Ni puala thuchah sawitu Social Welfare Minister Dr K. Beichhua chuan Ruihlo Hmansual leh dan kalha ruihlo tawlh dona chu state chhunga mipuite zawng zawng mawhphurhna aa ni  a ti. Sawrkar, tlawmngai pawlte, De-addiction Centre enkawltute emaw mi thahnem ngai fal te kutah mawhphurhna kan  dah ringawt chuan thui a kal theih loh a. " Ruihlo hmansual hi ven theih a ni a, hmangsual mekte pawh enkawl theih an ni", tiin hemi kawnga  hmalaknaah te mi zawng zawng kan tanrual a ngai a ni a ti.

Kum 40 chuang ruihlo avangin Mizoramin harsatna a tawh thu sawiin tun thlenga hma kan sawn theih loh na chhan te tumah inmawhpuh bik lovin kan inenchian theuha kan ngaihven tlan  pawh a tul hle tawh a ni a ti a. "Mizoram chu ruihlo tawlhna kawng a ni a; ruihlo te hian min kal pel mai lova. Min chamchilha, nunna tam tak kan chan phaha, mi tam tak chhawr tlak lohin a siam a; chhung kaw tam tak te kan rum a ni. He kan dinhmun tha lo tak hi sawrkarin a hrechianga Excise & Narcotics, Police leh a dang ten theih tawp an chhuah a. CYMA leh tlawmngai pawl thenkhat ten nasa takin tha an thawh mek bawk a. Kan zia chho viau tawh naiin kan tha erawh thlah chi a ni lova nasa zawka tan kan lak a ngai a ni", a ti. Kawngtin leh kil tinah sawrkarin theih tawp chhuah a tum tih a sawi a. Pawnlamah leh Jail chhungah te thleng pawh awmze nei zawka hmalak chhoh tum a ni a ti a. Kumin United Nations Office on Drugs and Crime(UNODC) World Drug Report 2019 in Jail chhunga zirchiannaah ruihlo hmansual avanga awlsam taka kai theih HIV, Hepatitis C, Tuberculosis(TB) leh a dangte chu Jail tang te zingah a pung nasa tih hmuh chhuah a ni a. Hei hi Mizoram sawrkar chuan a ngai pawimawh em em a. Mizoram Social Defence & Rehabilitation Board(MSD&RB) kaltlangin nasa leh zuala hmalak a ni dawn a ni a ti.

International Day Against Drug Abuse & Illicit Trafficking puala inkhawm hi  SWD, H&FW, H&MED, Mizoram Police, Excise & Narcotics, I.G. Prison, School Education, 23 Sector Assam Riffles, 46 Assam Riffles, Pushpak, BSF, MSACS, MRHG & CD, CYMA, FHI 360, LifCoDe, MDUF, FINGODAP leh MSD & RB tangkawpin a buatsaih a ni a. Pi Zoramthangi Hauhnar, Secretary, SWD chuan inlawmna thu sawiin programme hi tan a ni a. He hunah hian Mizoram Drug User Forum lam atangin ruihlo ngaiten an harsatna leh an thil tawn te sawina hun an hmanga. Fuihna thu ruihlo ngai zinga damna changte pual atangin ngaihthlak a ni bawk a. Ruihlo ngaite enkawltu lam atangin Dr. Chawnglungmuana, CEO, SHALOM in thu a sawi a. Ruihlo ngaite tanpuina kawngah tanpui tura intiamna thuziah sawirualna chu Pu R.Lalngheta, Vice President, CYMA chuan a kahruai a ni. Tin, vawiin programme-ah hian ruihlo avanga nunna chan te sunna leh hriatrengna pualin Sathau Khawnvar ahuhova chhit rual  a ni a. Ruihlo laka fihlim tura infuihna leh ruihlo ngaite tanpuina lama inzirtirna Video clip tawi, Ruihlo ngaite enkawlna tur leh khabu hrang hrang leh Ruihlo ngaite enkawlna hmun( De-Addiction Centre) te zawm ngei ngei tur leh inkaihhruaina lehkhabu( Standard Operation Procedures) te chu Khuallian SWD Minister Dr. K. Beichhua chuan a tlangzarh nghal a ni.

Ruihlo Ngaite puala thusawitu chuan Mizoramah Ruihlo ngawl veina chu rilru lamah natna anga pawm a nih hma leh ruihlo ngaite mimal nun  theuhte belhchian sak a nih loh chuan  ruihlo ngaite sim tir a harsat tur thu a sawi a. Ruihlo ngaite chu diriam mai lova tanpui tum turin ngenna a siam a; ruihlo nghei hun pawh a reh lo HIV te an kai lohna turin ruihlo ngaiten an hmanraw lo kawl thin te chhuhsak an ni thin chu thil pawi thei tak a ni a ti.

Substance Abuse chungchanga mithiamte sawidan chuan thildang ang lo takin Drug bikah chuan  Zawrh/tawlh(Supply) a tam chuan a duhtu(Demand) a pung daih thunga. Chuvangin Ruihlo tawlhte na taka hrem an nih theih nan mipuite tanrual tlan a pawimawh ber a ni an ti. Magnitude of Drug Use in India 2019 in zirchianna ang chuan  Opiate Drug hmansualah Mizoram chu India ramah a sangber a. Sedative Drug Abuse-ah pawh a sang ber zinga mi a ni leh bawk a. Mizoram chhunga ruihlo ngai zinga 25% chiahin inenkawlna hmunah an inhriattira, a dang 75% hian inenkawlna hmun emaw anmahni tanpuitu tur an pan lo a ni.