Vawiin khan Saitual Auditorium ah Remna Ni lawmna hun hman a ni a, bialtu MLA, P&E Minister ni bawk Pu R. Lalzirliana'n khuallian niin a hman pui a, Pu Lalrintluanga Sailo,MLA, Government Deputy Chief Whip leh Pu Ramthanmawia MLA te pawhin he hun hi an hmanpui a ni.

Saitual Auditorium a hun hman anih hma hian Saitual Field bula Hnam pasaltha martar mi 22 te hriatrengna lungphun tlawhin Pu R. Lalzirliana hian zahna chibai bukin pangpar a dah a ni.

Saitual Auditorium a mipui kalkhawm hmaah thusawiin khuallian Pu Zira chuan Remna Ni hi mizo mipui zawng zawngte ta a ni a, India sawrkar leh Mizo National Front ten remna ziak mahse Mizoram tana inrem an nih avangin mizo mipui zawng zawng huap a ni a ti a. Tlawmna ni a nilo a, mizo mipui zawng zawng, kohhran leh tlawmngai pawlte tawngtaina leh beiseina chhanna anih avangin kan tan chuan Hnehna Ni a ni a ti.

India ram leh khawvel hmun hrang hrang thlirin keini inremna tluka remna tluantling nei hi an vang a, hei hi mizo mipuite rinawmna vang a ni a ti a, hetihlai hian tun dinhmunah remna hnuaia zalenna kan hmuh hi kan hmang thiam ta lo tan ta em ni tih hi kan inzawt fo ta mai a, aia upa zahthiamna te, kohhran leh khawtlang zahlohna thawm te a ri ta fo mai a, kan insiamrem thuai a tul a ni a ti a, khawtlang thatna tura tlawmngai pawlte hmalakna hi kan tawiawm that a pawimawh hle ani a ti. Hnam pasalthate inhlanna leh tawrhna hi kan zah thiam a kan hriatreng a tul a ni a ti a, Hnam pasaltha ten huaisen taka ral an beihna hmun pawimawh te humhalh a chei tha turin hma lak tum mek ani a ti bawk.

Pu Ramthanmawia, MLA pawhin thusawiin rambuai lai ngaihtuahin remna leh muanna kan duh zia, kohhran leh tlawmngai pawl bakah zirlai pawl te, mipuite kan tawngtai nasat zia chhuikirin kan dilna te Pathianin mal a sawm a, zalenna hnuaiah kan awm ta a, he inremna hi tu party bil ta bik mah a nilo a, inchirhtheh nan hman loh hram a tha a ni a ti a, Saitual District thar din tura anmahni bialtu MLA hmalakna leh inpumpekna te a fakawm a tih thu sawiin lawmpuina thu a hlan bawk a ni.

Pu Lalrintluanga Sailo, Govt. Dy. Chief Whip pawhin District nei tura hun rei tak an lo beih tawhna a hlawhtlin tak avangin Saitual mipuite lawmpuina thu a hlan a, an tan tangkaina an neih theihna tur ang chi a awm chuan an inhawng reng tih a sawi bawk. Remna Ni hi hman uar deuh deuh a tul thu sawiin mipuite pawhin hei hi kan ngaihpawimawh zel a tul a ni a ti a. Ram leh hnam tana nunna hlan hi a namailo a, an inhlanna kan zah a tul a, thangtharte pawh ngaihlu tura kan zirtir thar deuh deuh a tul a ni a ti. Chhungkaw tin nghawng remna kan nei a, India Danpui Constitution su danglam dawrh thei inremna kan nei a ni a ti a, zirlaite leh thangtharte an fing telh telh a kan inremna thuthlung hlutzia leh kan hnam tana alo that zia an hrechiang telh telh dawn ani a ti.

Remna Ni vawi 33-na lawmna inkhawm ah hian Saitual khaw mipui te leh zirlaite an tel a ni.