Vawiin chawhnu khan MZU Sub-Headquarters, Reiek buatsaihin Remna Ni Lawmna chu Convention Centre, Tourist Lodge, Reiek-ah hman a ni a, Information & Public Relations Minister Pu Lalruatkima chu khuallian niin, he hun hi a hmanpui a ni. 

Khuallian PuLalruatkima chuan Reiek hian Kum100 zirna a neih avangin lawman hun pawh hman a ni tawh a, hemi khua atangin Central Service leh State Service ah inziaktling tawh mi engemaw zat an awm a, khua chhuanawm tak a ni a, chhang an nei khat deuh erawh chu ngaihtuah tham tak a ni, tiin a sawi a. Minister Pu Lalruatkima chuan Mizoram in India sawrkar awp behna atanga mahni a ro in relna a sualchhuah tum chhung Kum 20 vel hi Mizo History-ah sawi leh ziah hmaih theih a ni lo a, Kum 1986-ah remna leh muanna kan neih leh theih nan Mizoram Sawrkar, Mizo National Front leh India Sawrkar aiawh in Remna thuthlung ziah a ni a, remna ziah  a nih tak avangin khawtlang leh ram a lawm a, remna thuthlung ziah atangin Kum 33 na kan lo hmang reng tawh mai a, he remna leh muanna kan neih hnuaiah hian ramin hma a sawn a, lukhawng a neih theihna turin mimal leh sawrkar pawhin mawhphurhna a nei a ni, a ti a. Sawrkar hmasawnna tawiawm leh thurawn te pawh pe turin mimal tin te a sawm bawk a ni. Minister Pu Lalruatkima chuan Remna hi a hlu em em a, khawvel ram hrang hrang en in ram ralmuanglo a tam a, indona le hinepna a tam em em a, India ram ngeiah pawh tualthahna leh sualna hrang tam tak a awm a, chung zawng zawng karah chuan India ram chhunga State ralmuang ber kan nih theih chhan hi Zoram mipui vang a ni a, Kohhran leh NGO tha tak kan neih vang a ni bawk a ni, a ti a. Khuallian chuan Remna Ni hian hnam inpumkhatna lo thlen se, inpumkhatna chu  ram hmasawnna rahbi a ni, tiin a sawi a ni. 

Khuallian chuan rammu leh martar chhungte mi 22 hnenah Chawimawina Citation a hlan a, Government Middle School leh Government Modern Middle School, Reiek te chuan Cheraw ‘Kantluang’ leh Chheih Lam an entir a. Pu Isaac Zoliana chuan Remna Ni denchhen in paper presentation a nei a ni.

 He hunah hian AMC Councillor Pu R.Thanglura, RD Department Deputy Secretary Pu C.C Lalchuangkima, Reiek BDO Pu Ngurthansanga leh midang ten an tawiawm a, kalkhawm zingah hian YMA, MHIP, MUP hruaitu te bakah Government Middle School, Government Modern Middle School leh St. Benedict’s Higher Secondary School zirlaite an tel bawk a ni.