No.433/2021-2022

Dated Khawzawl, the 7th May, 2021: Nimin chawhnu dar 1:00 khan Pu Zothanmawia, Deputy Commissioner, Khawzawl District, District Level Task Force on Covid-19 Chairman ni bawk hovin Khawzawl Town chhunga Covid-19 Executive Team Leader-te leh Village Level Task Force Chairman-te chu DC Conference Hall-ah an thukhawm.

Meeting-ah hian Mizoram sawrkar order anga April ni 20, 2021 atanga Covid-19 Containment order kenkawh chungchang thlirletna neih a nih bakah naktuk Inrinnia District Headquarters-a dawr leh bazar hawn tur chungchangte ngaihtuah a ni.

Nimina meeting-ah hian Inrinni dawr leh bazar hawn huna inkaihhruaina mumal tak duan a ni a. Bazar turte chu chhungkaw pakhat atangin puitling pakhat aia tam lo, an awmna veng VLTF atanga chhuah phalna nei ngei leh facemask hmanga hmai ngei an ni tur a ni a. Khualkhua atanga Khawzawla bazar turte chuan an rawn chhuah tanna VLTF hnen atangin phalna an la tur tih a ni bawk.

Dawrkaite chuan uluk taka facemask hmanga hmai tuamin, dawr kawngkaah hrui an thlung vek tur a ni a, dawr chhungah a neitu/nghaktute bak luh phal loh a ni. Dawr-a rawn kalte hming, address leh phone number-te chu register-ah ziahluh zel tur niin, hand sanitizer inchhawp tur a ni bawk.  Anmahni dawrtuten social distancing vawng chunga an dawr theihna turin dawr kawtah marking mumal tak siam tura tih an ni.

Bazar leh khawlai hmun remchanga sa leh thlai zawrh chungchangah veng tina VLTF te chuan an veng dinhmun leh mipui mamawhna thlir chungin, a zawrhna hmun tur leh mipui pungkhawm tam lo tur leh social distancing kalpui theih turin ruahmanna an siam ang tih a ni a. Dawr hawn, sa leh thlai zawrh chungchanga VLTF te ruahmanna kenkawhpui turin Covid-19 Executive Duty-te chu beisei leh hriattir an ni bawk.

Inrinni-a dawr leh bazar hawn hi mamawh zualpui inlamna hun atan chauh a ni a, a duh apiang tana pawnchhuah leh len khawthawnna hun a ni lo tih tarlangin, hmanhmawh lutuk leh chuhhelh bik awm lovin, midang zai ngai leh VLTF te ruahmanna zawm chunga bazar theuh turin meeting chuan mipuite a ngen a ni.

Mizoram sawrkarin Covid-19 hrileng darh mek doletna atana inkhuahkhirhna a puan chu Khawzawl District-ah pawh khauh taka kenkawh mek zel a ni a. Executive Duty leh VTLF te ngawrh taka duty in, mipui khawlai chhuak an tlem hle a. April ni 21, 2021 atanga nimin May ni 6, 2021 thleng khan Khawzawl khawpui Zone hrang hrang 10 chhunga Executive Duty-te chuan Covid-19 inkaihhruaina dan bawhchhia mi 156 man tawhin, pawisa chawi tlingkhawm zat chu Rs 24,400/- a ni. 


Attachment

  • Loading attachment...