No.434/2021-2022

Lunglei the 7th May 2021-  Public Health Engineering Department (PHED), Lunglei WATSAN Circle hnuaia Lunglei khawpui chhunga mite tana online-a tui man (water bill) pek theihna tur chu vawiin khan Lunglei District Bawrhsap Pu Kulothungan A chuan DC Conference Hall-ah a tlangzarh.

District Bawrhsap Pu Kulothungan A chuan PHED-in online-a tui bill pekna kaltanga mipuite tana remchanna a siam sak chu Good Governance lama hmalakna pawimawh tak a ni tiin Department hnathkawtute chungah lawmthu a sawi a. COVID-19 hri leng karah phei chuan, bill pe tura thui tak intlar a, mi dang nena inhnaih chilha hri inkai chhawn palh theih laka mipuite vengtu tha tak a ni dawn tih sawiin, Lunglei mipuite chuan tangkai taka hman tum tur leh, la hmang thiam chiah rih lote pawhin thiam tuma zir turin a chah a. Bul tan tir chauh a nih avangin fuh tawk lo leh tihsual awm theiah mipui leh department lam pawh zawldawh taka indawr tawn thin turin a chah a ni.

He hun hi PHED Lunglei WATSAN Circle SE Er Ngentluanga chuan a kaihruai a, Er Lalropuia Hmar, Sr EE PHED Lunglei WATSAN Circle chuan Keynote Address neiin Er Lalduhawma Chhakchhuak, SDO chuan lawmthu sawina hun a hmang a ni.

He hunah hian PHED-a thawktute bakah, Lunglei Sub Hqrs YMA, Consumer Association hruaitute leh thu thar la khawmtute an kal khawm a ni.

Tui man hi PHED online payment portal www.phedmizoram.in/billpayment.php ah emaw, Paytm, PhonePe, GPay, Amazon Shopping apps hmang te'n emaw pek theih a ni a. Online-a tui man pek dawn chuan consumer account number (tui bill-a inziak thin) nen thlun zawm hmasak a ngai a. Payment Portal www.phedmizoram.in/billpayment.php atanga pek hian convenience fee tlem te chawi belh ngai awmin, apps dang atang chuan chawi belh ngai a awm lo thung.