No.901/2020-2021 

Vawiin khan Khawzawl District chhunga ei leh bar tharchhuah kawnga hmasawn theih dan tur leh hma lak zel dan tur District Bawrhsap Pu H Lianzela hova meeting ani.

COVID-19 hrileng hian ei leh bar tharchhuah pawimawh zia a rawn lantir chho mek zel a. Chuvangin ei leh bar tam zawk tharchhuak ngei tura hma lak hi Khawzawl District Level Task Force on COVID-19 chuan tih makmawh-a a ngaih avangin hetiang hian hmalak a ni.

Meeting-ah hian District chhunga Agriculture leh Horticulture potential areas Inspection Team ten a hmuna an lo enho tawh Kangbur ram, Bawnzau ram leh Tiau zau ram te-a a taka hmalak dan tur sawiho ani.

Meeting hian heng lai ram hi buh leh thlai bakah thei chi hrang hrang chin theihna hmun tha tak nih avangin tihtak zet a kalpui nise tiin a rel a. Concerned Department - Agriculture leh Horticulture Department ten concept note an siam pawh uluk taka sawiho ani a, a theih chin chinah a huhova hmalak (cluster approach) nise a ti bawk.

Ram neihdan phungin hma lakna a nghawng theih dawn avangin ram neitu awm leh ram awl lai te uluk takin Concerned Department ten lo zir chiang se, hmalakna dal thei khawp harsatna lian tham a awm lohna atan lo inbuatsaih lawk nise a ti bawk.

Kumin atanga hma lak nghal theih turin Concerned Department te inbuatsaih nise, thlai chinna hmun mai bakah a ken tel link road, tui lak leh tul dang awm theite pawh ngaihtuah nghal thei turin PWD, PHE, Irrigation & Water Resources Department, Land Resources, Soil & Water Conservation Department leh a kaihhnawih theih dang Department te pawh lo inbuatsaih nise an ti a. Land Use System pawh mumal taka siam a, Mizoram model tling thei turin tlang sang lam ramngaw atana zuah nise, chu chuan sik leh sa a vawn bakah  tuihna a siamtha anga, a dawt ah Horticulture crops, a hniam ber luikam hnai lamah Agriculture lam kaihhnawih awm se , chu chu a theih dan ang ang a kalpui nise tih an pawm bawk a ni.