No.900/2020-2021

Vawiin chawhma khan District Agriculture Office, Kolasib district hmalakna in Kolasib district chhung a Kolasib, Bilkhawthlir, Vairengte, Kawnpui, Bairabi leh Bukpui Circle hnuaia loneitu mi 599 te hnenah tlangram buh chi tin 847 semchhuah a ni a. He hun hi Pu J Rothanga, DAO Kolasib in kaihruaiin Dr H Lalthlangliana, DC in a telpui bawk a ni.

Dr H Lalthlangliana, Deputy Commissioner chuan Covid-19 hrileng avanga inkharkhipna kalpui a nih chhung hian ei leh bar a intodelh duhna kawngah harhtharna a thleng mek ni a lang chu lawmawm a tih thu a sawi a, a bik takin mizo thalai te hemi kawnga hmasawn tum a bei zel tura  a duh thu a sawi bawk a ni. DC chuan hrileng vang a harsatna hrang hrang awm thei te ngaihtuah chung a Sawrkarin hma a lakna te chu ngai pawimawh turin kalkhawm te a chah a, “Hamthatna leh tanpuina dawngten hlawhtlin tum a tihtakzet a kan beih ve na hi Sawrkar hnen a lawmthu sawina tha ber a ni”, a ti bawk.

Pu J Rothanga, DAO Kolasib chuan Kolasib district chhung a loneitute tan inkharkhipna kalpui chhung hian thlai chi leh buh chi tum engemaw zah sem chhuah a nih tawh thu a sawi a, “Tlang ram buh chi semchhuah te atanga chhut hian Kolasib district-ah buh hmun tin 900 (360 Hectare) awm tur a ngaih theih a ni a, hei hi thil lawmawm tak a ni,” a ti. Inkharkhipna kalpui chhung a loneituten harsatna an tawh loh nan khaw hrang hrang atanga buh chi lakkhawm zing ah Chawilung khua chuan buh chi tin 51 a thlawn a semchhuah tura an pe chu DAO chuan fakawm a tih thu sawiin, Kolasib mipui leh loneitute aiawhin lawmthu a sawi nghal bawk a ni.

He hunah hian Pu C Liankunga, President, Sub-headquaters YMA Kolasib pawhin thu sawiin, ngun tak a hma hun thlir chungin, he hri avang a ei leh bar a harsatna lian zawk kan tawh loh nan fimkhur tak chung si a ruahmanna kalpui a pawimawh thu a sawi a. Kolasib district chhung a huan, lo, ram a kan kuthnathawktute leh Sangha dil siamtuten inkharkhipna hnuai a pangai tak a an hna an kalpui theihna turin hmalak a tul thu a tarlang bawk a ni.

Vawiin buh chi semchhuah te hi Ratu, Zohmun, Lamchhip, Chawilung, Zanlawn leh Kawnpui atang a lakkhawm a ni a. Tin khat hi Rs 450 zel a lak niin, Chawilung khua atang a tin 51 chu a thlawn a dawn a ni a. Village Level Task Force kaltlang a semchhuah a ni dawn a ni.