Mizoram sawrkara Planning & Programme Implementation Department hnuaia Entrepreneurship Development Centre (EDC) leh Govt. Khawzawl College tangkawp buatsaih, ni hnih awh tur "Innovative Challenge on Business Solution to Sustainable Development Goals" tih thupui hmanga thalaite zirtirna leh inelna Govt. Khawzawl College Examination Hall-a neih chu District Bawrhsap Pu H.Lianzela, MCS chuan a hawng.

Hawnna hunah thusawiin, Pu H.Lianzela chuan Sustainable Development Goals (SDGs) thupui ber chu hmasawnna hian tumah a kalkan tur ani lo tih anih thu sawiin, SDG’s chu mipui tan a ni a, mitin thleng phak khuarei daih, hmasawnna ngelnghet leh tluantling neih hi a tum a ni, a ti a. Mahni hmakhua chauh ngaih luat avangin hmasawnna changchawiin leilung hausakna te kan hmang chereu thin hian chhuan lo la awm turte thlengin nasa takin a nghawng theih dawn thu leh an hmakhua ngai chung zela hmasawnna kalpui chu SDG’s tum bulpui ber anih thu a sawi a. Sawrkar budget leh hmalaknate anihna ang tur taka kalpui anih a, huapzo leh dawmkan ngaite a thlen vek theihna tura tanrual angaih thu sawiin, thalaite chu leilung hausakna chhawr thiam tur leh sawrkar scheme-te dik leh felfai taka hmasawnna lam zawhna atana hman anih ngei theihna tura zirchiang thin turin a chah bawk.

Khuallian chuan rinawmna leh taihmakna nena hmathlir thui tak siam thiam a pawimawh thu pawh sawiin, mihring pung zelah ei leh in mamawhna a sang ve zel a, ram awl zau tak tak kan neihte hi kum tluana ei leh in kan neih theihna tura kan chhawr tangkai thiam angai a ni, a ti a. Thalaite chu hmathlir thui tak nei tura inbuatsaih tura chahin, "Mihringte kan thi a, kan inkalsan a, hnam pawh a ding chhuak a, a tla chhe leh a, mahse ngaihdan erawh chu a nung reng a ni”, a ti a. Ngaihdan tha tak tak leh tawnhriatte sawihoa a tangkai thei ang bera hman anih theihna tura inrawnkhawmna hun Entrepreneurship Development Centre-in a buatsaih chu lawmawm a tih thu a sawi a. Kalkhawmte chu mipui huapzo hmasawnna thlen tura mawhphurtu theuh an nih thu hrilhin, SDG’s thupuite chu mimal, chhungkua leh khawtlang nunah kan sengluh theih phawt chuan ram leh hnam tan rah tha tak a chhuah thei dawn a ni, a ti bawk. Kan nihna, dinhmun leh harsatnate kan hriat chian angai a, chumi hmachhawna chinfel dan turte pawh kan zawn thin a ngai a ni, Pu H.Lianzela chuan a ti a. EDC leh Govt. Khawzawl College buatsaiha mipui vantlang harsatna chhawpchhuaka sawihona tha tak Khawzawl hmuna buatsaih ani chu lawmawm a tih thu sawiin, tangkai taka hman anih ngei theihna tura duhsakna hlanin a hawng a ni.

He inelnaa tel thalaite hi thupui thlan bik hmangin district chhunga harsatna hrang te zirchiangin project an nei dawn a, group-ah inthenin engtiangin nge khua, veng, mimal leh district-in harsatna a sutkian theih ang tih lam hawiin project an siam ang a, project nei tha ber hian lawmman an dawng dawn a ni.

Hawnna hun hi Pu R. Lalrintluanga, Principal, Govt. Khawzawl College chuan kaihruaiin kalkhawmte lawmna thu a sawi a. He hunah hian EDC lama mithiamte leh Master Trainer-te’n thupui hrang hrang hmangin zirtirna an pe a, sawihona bakah zawhna leh chhanna hunte neih thin a ni.