3263/2023-2024

Khawzawl, 7th January 2023: Nimin chawhnu khan Khawzawl Bawrhsap Pu K. Lalrohlua chuan Alpha Hotel, Khawzawl Vengthar a mi chu khuallian niin a hawng.

Hawnna inkhawm Alpha Hotel inchung zawla neihah thu sawiin Pu K. Lalrohlua chuan Khawzawl khuaah Hotel tha leh changtlung tak a awm ta chu lawmawm a tih thu a sawi a. Khawzawl khua chu District khawpui a nih tak avangin khawpui dang ang te bawkin sawrkar leh mimal tan mamawh leh tul tam tak a awm ve ta a, chung zinga pawimawh tak pakhat - khual tha thlen theihna tur, ei leh in tuihnai tak awmna ni bawk hman theiha peihfel a ni ta chu a lawmawm hle a ni, a ti a. Vawiina hotel hawn thar chu Mizoram hmundanga mi te nen khaikhin pawhin zahpuiawm lo, a sakphung ah pawh tha tak nia a hriat thu sawiin, khuallian chuan an kal leh zelna turah duhsakna sang ber a hlan thu a sawi bawk a ni.

Nimin inkhawm hi Dr. Malsawmkimi, Sr. Scientist & Head, KVK Khawzawl chuan a kaihruai a. Hotel neitu Pu Lalengmawia pawhin thu a sawi a, Technical report a tarlan danin hotel hi cheng nuai 120 senga sak a ni a. Mizopa chhiara chhawng sarih niin, room chi hrang hrang (single, double, deluxe etc) 15 bakah mipa leh hmeichhia dormitory te a awm a ni.