No.2309/2021-2022

Aizawl the 23rd September, 2021: Vawiin chawhma dar 10:30 khan Pu C.C. Lalchhuangkima, Deputy Commissioner & Chairman, District Disaster Management Authority, Khawzawl District chuan Khawzawl District-a chhungkaw harsa zualte chhawmdawlna semchhuah tur DC Pisa tualah a vailiam.

Hemi puala programme tawi Pu Lalrohlua, Additional Deputy Commissioner kaihhruaiah thu sawiin, Khawzawl District Bawrhsap Pu C.C. Lalchhuangkima chuan Covid-19 hrileng do nana inkhuahkhirhna hrang hrang kalpui a ngai thin leh, chumi avanga chhuanchham leh chhuanchham maithei dinhmuna ding chhungkaw engemawzat chhawmdawl ngai an awm thin chu pawi a tiin a tawrhpui thu a sawi a. Chhuanchham leh harsa zawkte tanpui tura Khawzawl Officers Club leh mimal inphalte inpekna fakawm a ti a, theihtawp chhuah thintu DC Office Staff-te hnathawh chu chhuanawm tiin, District khata Office pui bera thawkte tih atan pawh a inhmeh hle a ni, a ti bawk.

Pu F. Hmingsangzuala, LDC, DC Office-in report a pe a. Chhawmdawlna pekte hi Khawzawl District-a khaw pali heng- Biate atangin chhungkaw 127, Chawngtlaiah chhungkaw 43, Ngaizawl atangin chhungkaw 100 leh Sialhawkah chhungkaw 10, an vaiin chhungkaw 280 an ni tih a tarlang a. Heng chhungkaw 280 ah hian member 1225 an awm a ni.

Chhawmdawlna hi mi pakhatah buhfai kg 5 zel leh, chhungkaw pakhatah dal kg 1 zela sem niin, a vaiin buhfai quintal 61.25 leh dal kg 280 semchhuah a ni a. Chief Minister's Relief Fund, Khawzawl Officers Club leh mimal atanga lutkhawm Rs. 2,40,250/- (cheng nuai hnih, singli zahnih sawmnga) senral a ni.

Vawiina chhungkaw harsa zualte chhawmdawlna semna hunah hian DC Office Staff-te bakah Chanchinbumite an tel a ni.