No.2310/2021-2022

Aizawl, 23rd September, 2021 : Tukin zing khan Tourism Minister Pu Robert Romawia Royte chuan Central Scheme PRASAD project atanga Khawthlirna (Viewing Gallery) Laipuitlanga sak dan tur hmun a en a. Minister chuan Aizawl tlawhtu khualzinte leh tualchhung mi ngeite pawhin hawi thawvenna leh intihhlimna an mamawh a, Tourism Deptt-in PRASAD Scheme atanga Khawthlirna (Viewing Gallery) siam a rawtna chu Tourism Ministry chuan pawmin sanction approval lehkha tun hnaiah a tichhuak a, a taka sak dan tur duan vat a tul a, PHE Tuikhuah lian awmna a nih avangin PHE Minister, Dy CM ni bawk rawn a nih hnuah enho a nih thu a sawi a. A tul angin PHE tuikhuah lian pawh cheithat nghal a rem theih tur thu Tourism Minister Pu Robert Romawia Royte chuan a sawi.

Minister chuan Laipuitlang chhipa khawthlirna siam tur hi uluk a ngai a, a kaihhnawih Sorkar Deptt leh AMC te bakah mithiamte pawh a tul angin rawn an ni ang a, mit la tur thil hrang hrang leh eng mawi (illumination system) te pawh dah tum a ni a ti. He hmun enhonaah hian Pu Ramthanmawia, MLA & Vice Chairman, Bamboo Link Road Board, Pu V.Lalengmawia Tourism Director te, PHE Deptt Officer te leh Laipuitlang khawtlang hruaitute an tel a ni.

Pu Robert Romawia chuan Govt Complex-a Contact Sports Centre din rawtna hmun pawh tukin zingah chuan a tlawh bawk a. Minister chuan combat/contact sports discipline hrang hrangten an puala centre an neih theih nana indoor stadium lian tham sak chu sorkarin tul a tih thu a sawi a, covid hripui avangin sum sanction la awm lo mahse Central sorkar atangin beiseina sang tak an neih thu a sawi. He huna tel ve Combat sports hruaitute chuan an la neih ngai loh Contact Sports Centre din tumna awm chu lawmawm an tih thu an sawi a, sorkar hmalakna an thlawp tlat tih an sawi.

He huna Minister tawiawmtu Pu Zothantluanga Bialtu MLA & Vice Chairman, HRD Board leh Pi Chuauzikpuii, Bialtu Councillor te pawhin thu sawiin an biala sports hmasawnna liantham siam tura Sports Minister hmalakna ah lawmthu an sawi a. Minister hi Pu Vanlalrova Dy Director, Sports Deptt leh Contact sports Associations hruaitute leh Govt Complex khawtlang hruaituten an tawiawm bawk a ni.