2826/2026-2027 

Khawzawl, dated 26th October, 2026 : Vawiin khan Mizoram State AIDS Control Society (MSACS) Project Director Dr. Jane Rinsangi Ralte chuan Khawzawl tlawhin, Deputy Commissioner Pu K. Vanlalthiana nen DC pisa-ah an inkawm a. He hunah hian Khawzawl Chief Medical Officer Dr. Shahnaz M. Zothanzami, Khawzawl District Hospital Medical Superintendent Dr. Albert Lalhminghlua leh official dangte an tel a ni.

Dr. Jane Rinsangi Ralte chuan Khawzawl District chu Mission AIDS Suraksha-ah Surakshit dinhmun an thleng thei chu lawmawm a tih thu a sawi a. Khawzawl DC thahnemngaihna fakawm a tih thu sawiin, kan ram leh khawtlang kan hrisel theih nan HIV dona kawnga tan la zel turin leh Surakshit+ dinhmun thleng pha thuai tura chak taka hma la zel turin a ngen.

Khawzawl DC Pu K. Vanlalthiana pawhin thu sawiin, Surakshit dinhmun thleng tura CMO leh Medical Superintendent te thawhrimna avangin lawmthu a sawi a. HIV vei hmuh chhuah leh a inkaichhawn ven kawngah theihtawp an chhuah zel tur thu a sawi.

MAS thiltum chu 95:95:95 niin, a awmzia chu HIV hrik pai zawng zawng zinga 95% in hrik an pai tih an inhre tur an ni a (1st 95) , HIV kai, an dinhmun hre zawng zawng zinga 95% in Antiretroviral Therapy (ART) an ei tur a ni a (2nd 95), ART ei zawng zawng zinga 95% viral load a tla hniam tur a ni (3rd 95). Khawzawl District chuan 1st 95, 2nd 95 leh 3rd 95 achieve tawhin, Surakshit dinhmun a pha a. Surakshit+ chu HIV+ nu in a naupai a kaichhawng lo (zero mother to child transmission) tur a nj.

Vawiin hunah hian sawrkar hotute chuan HIV do kawnga harsatna awmte leh hma lak zel dan tur an sawi ho.