4808/2024-2025

Khawzawl, dated 25th March 2025: Vawiin khan Khawzawl DC Meeting Hall-ah UD&PA Department buatsaih District Beautification Competition a Khawzawl District-in lawmman pakhatna a dawn lawm dan tur rel a ni.

He hun hi Khawzawl Bawrhsap Pu K. Vanlalthiana'n kaihruaiin, Khawzawl District-in lawmman pakhatna a dawng chu lawmawm a tih thu a sawi a, he dinhmun a ding thei tur a tha thawhtute chungah lawmthu sawiin, an zavaia thawhrimna zara he dinhmun a ding thei an nih thu a sawi. Bawrhsap chuan an lawmman dawn chu an bultanna chuah a la nih avangin an hmabak a an hmachhawpte tha taka an hlen chhuah zel theih nan theihtawp chhuahpuiah a sawm a ni.

District Beautification Competition lawmna leh Launching Programme ni bawk chu 27th March 2025 chawhnu Dar 2:00 ah DC Office tualah neih tur a ruahman niin he hunah hian Home Minister Pu K. Sapdanga chu Launching Programme telpui turin beisei a ni.

UD&PA Department buatsaih District Beautification Competition Competition hi December ni 17, 2024 khan hawn a ni a, he inelna hmang hian District tinin an khawpui cheimawina tur leh thawmthatna tur hrang hrang atan District Beautification Detail Project Report (DPR) an buatsaih a, chung ruahmanna an siamte chu February ni 27, 2025 khan thehluh niin a tuk February ni 28-ah an ruahhmanna chu sawifiah leh a ni. He inelna endik tura ruat MZU a Department of Planning and Architecture hotuten March ni 3 khan District hrang hrang tlawhin ruahhmanna an siamdan leh a tihhlawhtlin dan tur an endik a ni.