Khawzawl District Level Committee on Fire Prevention thutkhawm hmasa ber, Chairman District Bawrhsap Pu H. Lianzela hova nimin ni 6/2/2020-a neih chuan Khawzawl khawpui chhungah kangmei ti chhuak lo tura mipuite fimkhur tura hrilhhriatna, Awareness Campaign neih nise tiin District chhung khaw hrang hrangah pawh VC leh YMA te hnenah kangmei laka mipuite fimkhur a tul thu uar zawka puangzar turin ngen nise an ti.

Khawzawl D.C. Conference Hall a Khawzawl District Level Committee on Fire Prevention thutkhawm vawikhatna neihah hian kalkhawmte chuan Fire Prevention Week hawnna chu Khawzawl khawpuiah tun thla February ni 10 chawhma dar 10:30 hian Electric veng YMA Hall-ah neih nise an ti a, khuallianah District Bawrhsap, Committee Chairman nise tiin an rel a, hetah hian Head of Office, VC, NGO, zirtirtute leh Govt. Khawzawl College zirlaite sawm nise an ti. Committee chuan lo hal hun atan State Level Sub-Committee-in a lo ruat sa, March ni 15 hma tih chu khauh taka kenkawh nise tiin a zawm lo khua an awm chuan an chungah action lak nise an ti a. Kangmei laka fimkhur tura infuihna leh inhrilhhriatna, Awareness Campaign chu Khawzawl khawpui chhung veng hrang hrangah neih nise an tih bakah District chhung khaw hrang hrangah kangmei laka fimkhur a tul thu mipuite hnena uar zawka puang zar turin Village Council te leh YMA Branch hrang hrangte ngen nise an ti a. District chhunga kawng siam hna thawk mekte pawh kangmei ti chhuak lo tura fimkhur turin ngen nise an ti a, lo hal turte pawh meilam tha taka sat turin Committee chuan a ngen nghal bawk.

Khawzawl District Level Committee on Fire Prevention Meeting hian District Level Monitoring Committee din nghalin, Committee hian kangmei venna kawnga khaw hrang hrangte hmalak dan thlithlaiin an vil dawn a. A tul angin Monitoring Committee hian Awareness Campaign pawh kalpui se tiin an rel a ni. Fire Prevention Week denchhen hian sawrkar leh mimal a ti thei âwm deuhte hnenah an office, in leh dawrah anmahni leh midangte him zawk nan Fire extinguisher dah tura ngen nise an ti bawk.

Vawiin Meeting-ah hian Member Secretary Pu P.C. Lalchhandama, DFO Wildlife Division, Khawzawl bakah Khawzawl khawpui chhunga Sawrkar Department hrang hranga Head of Office te, Khawzawl Joint VC Chairman, Khawzawl Joint YMA President, Khawzawl Joint MHIP President bakah MJA aiawh te an tel a ni.