1149/2026-2027

Dated Khawzawl, June 24, 2026: Vawiin khan DRDO Conference Hall, Khawzawl-ah Rashtriya Gram Swaraj Abhiyan (RGSA) hnuaiah Khawzawl District chhunga Village Council (VC) pathum—Khawzawl Darngawn, Khualen, leh Tlangpui ten ṭangkai taka an hman turin Computer set sem chhuah a ni a. He Computer set semna hun hi Pu K. Lalhmuakliana, District Local Administration Officer (DLAO), Khawzawl chuan a kaihruai a. Pu K. Zorammuana, Additional Deputy Commissioner (Addl. DC), Khawzawl chuan khuallian niin he programme hi a hmanpui.

Khuallian Pu K. Zorammuana chuan thu sawiin, tunlai khawvelah khawtlang hmasawnna tura sawrkar hmalakna lawmawm a tih thu leh ṭha taka hnathawh a nih theihnan technology a pawimawh hle tih a sawi a. VC-te'n VC tharte nen charge inhlan chungchangah VC bungraw neih ang angte kim taka inhlan chhawng zel ṭhin turin a fuih a. Vawiina Computer set sem takte chu VC-ten khawtlang enkawlna leh mipui rawngbawlna kawngah ṭangkai taka hmang ngei turin a chah bawk a ni.

He hunah hian Computer dawngtu VC aiawhte leh official pawimawh dangte an tel a, VC aiawh te pawhin lawmthu sawiin he Computer Set thar hian VC Office hnathawh a tihchak ngei an beisei thu an tarlang a ni.