454/2024-2025

Khawzawl, 10th May, 2024: Vawiin khan Khawzawl District Sports Committee chu Khawzawl DC Meeting Hall-ah an chairman Pu K. Lalrohlua hovin an thu khawm a. An thu rel zingah District Sports Festival huaihawt leh Khawzawl District Sports Complex din tura hma lak te chu a langsar zual a ni.

Thutkhawm kaihruaitu Khawzawl Bawrhsap Pu K. Lalrohlua chuan kalkhawmte inlawmna thu sawiin, rorel thupui hrang hrang te a sawifiah a. He mi hnu hian rorel tan a ni. Vawiin thutkhawma thurel tlangpui te chu:

1.    Khawzawl District Sports Complex tur hi Khawzawl Kawnzar Vengah hmun rem tha tak a awm a. He mi chungchang hi khawtlang hruaitu ten ziakin December 2023 a Home Minister Pu K. Sapdanga leh Sports Minister Pu Lalnghinglova Hmar ten Khawzawl an rawn tlawh khan an lo thlen tawh a. Chief Minister Pu Lalduhoma’n March 2024-a Khawzawl a tlawh khan an lo thlen leh bawk a ni. District Sports Committee hian District Sports Complex changtlung tak neih a nih ngei theih nan chak taka hmalak ni se tiin an rel a, Chairman-in sawrkar hotute lo sawi pui se tiin thu an dah bawk.

2.    District pum huap Infiamna khawmpui lian, Sports discipline hrang hrang hmanga inelna - District Sports Festival buatsaih an rel a. Lawmman hi District Sports Committee in a tum sak ang. A hun leh hmun tur hi thutkhawm leh a rel a tan dah a ni a. District Sports Festival hlawhtling taka neih a nih theih nan Bialtu MLA leh sawrkar hotute tanpuina dil ni se.

3.    Ram pum huap inelna hrang hrang - 19th Inter-District Boxing Championship, PS Dahrawka Memorial Chess Tournament leh a dang te a medal la te lawmpui dan tur pawh rel a ni a. Chairman-in ruahmanna lo siam se tia thu dah a ni.

4.    Inter-District Boxing Championship a Khawzawl District aiawha Gold Medal la tu – Lalchhanchhuaha s/o Lalhruaitluanga chu vanduaina a tawh avangin enkawl mek a ni tih tarlan a ni a. District Sports Committee hmingin ₹ 5000 a kan an rel bawk.

Vawiin District Sports Committee-ah hian official, District Sports Committee OB leh Sports Association hruaitute an kal tha hle a ni.