453/2024-2025

LUNGLEI; the 10th May, 2024: Vawiin khan Synod Mission Centre, Salem vengah Tourism Department bultumin Tourism Awareness Programme (T.A.P) buatsaih a ni a. Pi C Ramsangzuali, Tourist Officer chuan programme kaihhruiin, kal khawmte chawnglawmna thu a sawi a. Mizoram Tourism dinhmun  sawifiahin, kalkhawm te nen Tourist Pledge an sawirual nghal bawk a ni.

Pu Donny Lalruatsanga CEO, LMC chuan vawiin programme hi hmanpuiin, thu sawina hun pawh a hmang nghalin, Pu Donny chuan Tourism Industry chu tunlai huna a pawimawh telh telh a, khawvel mihring changkang zelah khualzin leh anmahni buaipuina kawngah hmasawnna nasa tak a thleng mek a ni, a ti. Tourism Industry chu industry pawimawh tak a ni a, thalai tamtak tan eizawnna petu a nih piah lamah, ram hmasawnna atana thawh hlawk tak a nih thu a sawi a. Kalkhawm te chu kan ban phak chinah theih hmasawn tum turin a chah a ni.

Mizorama Tourism dinhmun sawitu Pi R Lalrodingi chuan Mizoramah Tourism in hmasawnna nasa tak a neih thu sawiin, a mi cheng ten kan thiam phawt chuan tun aia nasa in Tourism lamah hmasawnna a awm thei a ni, a ti. Mizoram sawrkar chuan theihtawp chhuah a tum thu leh, hmalakna tur hrang hrang a duan thu sawiin, chumi atan chuan mipui te buatsaih hmasak a tul a, Tourist Service Provider bakah zirlai te hnenah awareness pek chu thil tul tak a nih thu a sawi bawk. Mizoramah Tourist engemawzah an awm thu sawiin, Mizoram sawrkar chuan Local Tourism lam pawh nasa taka tih hmasawn a tum a. Mizoram chhunga cheng te, chhungkua leh mimal anga Tour kan intihhmuh deuh deuh a tul a, hei hian chhungkaw nun leh thalai te nun thlenga a siamthat theih an beisei thu sawiin, Tourist te buaipui kawngah pawh tun aia hma kan sawn a, mi hip thei tura kan inbuatsaih a tul hle a ni, a ti bawk.

Tourism Department Director chuan Aizawlah chuan Tour Operator engemawzah an awm thu sawiin, Mizoram hmun dangah tan kan lak a tul a ni, a ti a. India ram chhung mi emaw, Foreign atanga lokal te buaipui kawngah District hrang hrang inhlan chhawng thei turin, Mizoram hmun hrang hrangah Tour Operator leh Tour Guide tha tak tak kan neih a tul tih a sawi a. Service Provider te chuan an tih theih thu hrilhin, hmasawnna step tharah hmang turin a chah a ni.

Vawiina Tourism Awareness Programme hi hun hnihah then niin, hun hnihnaah Mizorama Influencer lar tak PC Zira chuan “Potential of Tourism Industry in Mizoram Adventure and Herritage Tourism” tih thupui hmangin kal khawmte hnenah zirtirna a pe a. Riahrun Tours and Travelks neitu Pi K. Lallawmzuali chuan “Tourism and Travel Business – Introduction, How to start a Business in Tourism Industry” tih thupui hmanga zirtirna a  pe a. Pi Lallianmawii Bawitlung, VIVA Consultancy a Trainer  pawhin  “Basic Ethics in Tourism Industry : Accomodation unit, Restaurants and other Tourism Related” tih thupui hmangin Lecture a pe bawk a ni.

Vawiina Tourism Awareness Programme-ah hian Lungleia Hotel, Restaurant leh Home Stay neitute bakah School hrang hrang atangin zirlai Hall a leng lo khawp an kal khawm a ni.