456/2023-2024

Khawzawl, the 16th May, 2023: Khawzawl District chhunga leichi (fertilizer) lakluhte thlithlaia dan ang taka hralhchhuah a ni em tih leh, dan lova tawlh ruk a awm em tih endik tura s sawrkarin a din, District Vigilance Committee on Fertilizers, Khawzawl District chu vawiin chawhma dar 11:00 khan an Chairman Pu K.Lalrohlua, Khawzawl District Bawrhsap hovin a Office Chamber-ah an thukhawm.

Meeting kaihruaitu District Bawrhsap Pu K.Lalrohlua chuan Khawzawl District chu dan phal lova khawchhak lama leichi (fertilizer) phurh luhna kal kawng a nih avangin Line Department leh Police-te tha thlah lova tang sauh sauh turin a fuih a ni.

Meeting-ah hian Khawzawl District-ah dan lova fertilizer tawlh ruk tum thum man a nih tawh thu leh fertilizer man tawh zawng zawng zat chu bag 3540 a nih thu te, hemi tihralna atanga sum hmuh zawng zawng Rs 9,41,640/- chu sawrkar sumbawmah chhun luh a nih thu tarlan a ni a. Hei bakah hian Khawzawl District tan Fertilizer Dealer pahnih, C&P Traders leh Magadan Traders-te an awm tawh thu leh dan anga leitha an pek chhuah theih tawh thute ngaihthlak a ni a. Fertilizer Dealer mumal tak Khawzawl District-a a awm theihna tura sawrkar hmalakna chu lawmawm an tih thu meeting-ah hian sawi lan a ni a. Dan lova hralh tur fertilizer man kawnga Agriculture Department hnuaia thawktute leh Khawzawl Police-te inpekna leh tha thawhna avangin District Vigilance Committee on Fertilizers chuan lawmthu a sawi bawk a ni.

Vawiin District Vigilance Committee on Fertilizers thutkhawmah hian Khawzawl SP Pu Lalchhuanthanga bakah DAO leh AMFU aiawhte, Fertilizer Dealers leh Official dang-te an tel a ni.