454/2023-2024

Aizawl the 16th May, 2023 : Vawiin khan Health Minister Dr R.Lalthangliana chuan Momentum Routine Immunization Transformation and Equite (MRITE) program hmanga COVID immunization kalpui dan chungchang thlirletna leh sawihona hun Mission Foundation Movement buatsaih chu Hotel Regency, Aizawlah a hmanpui.

Dr R.Lalthangliana chuan Mission Foundation Movement te hmalakna chhuanawm tiin COVID vanglaia mahni intumchawpa COVID damlo te enkawl tu tur nurse leh health worker engemawzat an tirh chhuah avangin lawmthu a sawi a. COVID vanglai, hun khirh lai thlirletin sawrkar mai ni lo, mipui mimir, kohhran, pawl hrang hrangte inpekna a chhuanawm tak zet a ni, a ti. Sawrkar tha ti chak turin, mitinin COVID vaccine an dawn theih nan MRITE program tha taka an kalpui avangin lawmthu a sawi a, he program kaltlang hian Mizoram tan thil ropui tak an ti a ni, Health Minister chuan a ti. Health Department pawimawhzia sawiin hriselna tel lo chuan hmasawnna a awm thei lo a, dam leh hrisel hi mihring te mamawh lian ber a nih avangin sawrkar pawhin a ngai pawimawh tih Dr R.Lalthangliana chuan a sawi a. A department hmasawnna thenkhat a sawilan zingah Mizoram state chu Infant Mortality Rate ah ram pumah a hniam ber a, NITI Aayog chuan India rama state te (small state) zingah Mizoram chu Health Index-a titha berah a thlang a ni, a ti.

United States Agency for International Development (US-AID) cchuan COVID vanglai khan India rama COVID do nan sum cheng vaibelchhe 180 chuang a pe a. Union Health Ministry leh State a Health Department te thawhpuiin India ram hmun hrang hrangah vaccine a sem a. Momentum Routine Immunization Transformation and Equite (MRITE) project kalpuiin tar chak lo te, rualbanlo te, harsatna hrang hrang avanga vantlang mipui pawh pha lo ten COVID vaccine an dawn ve ngei theih nan tan an la a. India ram state 18 ah District 241 an tuam a. Mizoram chhungah chuan MRITE project hi District 5 ah kalpui a ni. Mizoramah hian Mission Foundation Movement leh Church’s Auxiliary for Social Action (CASA) te chu John Snow India Private Limited (JSIPL) kaltlangin MRITE program an kalpui a. MFM hian Lunglei, Mamit leh Kolasib an chang a, CASA te hian Siaha leh Lawngtlai District an chang thung a ni. He project hi February 2022 khan bultan niin tunah hian a thawh thumna a kal mek a, May 23, 2023 hian zo thei tura ngaih a ni.

MFM bik hian Kolasib, Mmit leh LUnglei ah belhkhawmin Covid vaccine hi 35,671 an pe chhuak tawh a ni.

Vawiin programme ah hian Pu Anil Gupta, State Support Lead, JSIPL leh Pu Vijay Paulraj, Senior Health System Strengthening Advisor, USAID India te pawhin thu an sawi a. Hawnna programme neih zawh hnu hian thupui hrang  hrang thlanbik hmangin State chhung leh pawn atanga mithiam ten kalkhawm te zirtirin workshop an hmang chhunzawm a. Lunglei, Siaha, Kolasib, Lawngtlai leh Mamit atangin District Immunization Officer te leh Village Council President te, tlawmngai pawl hruaitu leh kohhran hruaitu te an tel a ni.