31/2025-2026

Khawzawl, dated 3rd April 2025: Vawiin chawhma dar 11 khan DC Meeting Hall-ah Adventure Tourism chungchang sawi ho turin Directorate of Tourism aiawh te leh Khawzawl District chhunga Village Council (VC) hrang hrang member te an thukhawm a, Khawzawl DC Pu K. Vanlalthiana'n hun a kaihruai.

Chairman Pu K. Vanlalthiana chuan Addl. DC Pu Lalfakzuala adventure tourism sawi hawng turin a sawm a, Addl. DC chuan Khawzawl district-a khaw hrang hrangah hmun nuam leh mawi tak tak, mipui leh khualzin hip thei tur a awm a, heng hmun te hi siamthat a cheimawi dan tur te, in vawrh lar dan tur te leh thawh ho dan tur te sawi ho a tul tih a sawi. SDO (Sadar) Pu Suvigya S. Chandra, IAS chuan presentation a pe a, adventure tourism hnuaia tih theih hrang hrang, trekking te, hot air balloon ride te, cycling te, paragliding te, kayaking te leh a dang tam tak sawiin VC member te an khuaa tih theih tur lo ngaihtuah turin a sawm a. VC member te chuan an khuaa hmun tha te, hmun dangdai te leh a hmaa khualzin lo kal thin tawhna te an sawi hlawm a, sawihona tha tak neih a ni. Directorate of Tourism atangin Pi Rosie Liannguri chuan capacity building chungchang a sawi a, tourism kalhmang tlangpui a sawi bawk a ni. Chairman Pu K. Vanlalthiana chuan intawhkhawmna tha tak an neih theih avangin lawmthu a sawi a, khualzin ngah hian district tan sum a lakluh mai bakah mi hriat kan hlawhna a ni a, tourism a tan la zel turin kalkhawm te a fuih bawk a ni.

He hunah hian BDO Pu Timothy R. Lalhmangaiha leh SDC Pu Paul Rokima bakah Khawzawl district hrang hrang VCP leh pawl hrang hrang aiawh te an tel a ni.