657/2026-2027 

Dated Khawzawl, the 22^nd May, 2026 : Vawiin khan 22-Tuichang (ST) A/C chhunga BLO-te tan DC Conference Hall-ah Special Intensive Revision (SIR) 2026 atan training neih a ni a. Khawzawl Bawrhsap Pu K. Vanlalthiana chu khuallian a ni.

Pu K. Vanlalthiana chuan Khawzawl district chu SIR 2026 kalpui turah hian district hrang hrang zinga hmahruaitu an ni thei chu lawmawm a tih thu sawiin, Chief Electoral Officer pawhin an hmalakna tha a tih thu a tarlang a. Electoral roll thar dik leh felfai zawk kan neih theih nan BLO kalkhawmte chu training hi hlawkthlak taka hmang turin leh zawhfiah duh an neihte pawh zawt zel turin a chah.

Vawiin training-ah hian District Level Master Trainer (DLMT) Pu PC Lalrindika chuan SIR chungchang sawifiahna leh sawizauna hun a hmang a. Assistant Electoral Registration Officer Pu R. Lalrinhlua, DLMT ni bawk hnen atangin BLO-te tih tur leh mawhphurhnate ngaihthlak a ni a. Election Officer Pu Timothy R. Lalhmangaiha chuan ECINET leh BLO Apps hman dan zirtirna pe-in, Electoral Registration Officer Pu Chandrakant Bagoria hovin sawihona leh hriatchian duh inzawhfiahna hun hman a ni a, Khawzawl district-ah hian Electoral roll-a hming thlunzawmna (mapping) hi 91% tih zawh tawh a nih thu tarlan a ni. SDC Pi Lalthanpari Khawlhring chuan lawmthu sawiin hun a khar a ni.