656/2026-2027

Lawngtlai, 22nd May 2026: Vawiin khan District Election Officer (DEO) leh Bawrhsap nibawk Pu Donny Lalruatsanga kaihhruaiin DC Conference Hall -ah 'Special Intensive Revision (SIR) of Electoral Roll 2026' kalpui tur chungchang sawihona neih a ni. 

Pu Donny Lalruatsanga chuan Special Intensive Revision (SIR) kalpui turah dik, felfai leh rintlak taka hnathawh a tul dawn hle tih tarlangin, mawhphurhna neite fimkhur leh uluk taka hnathawk turin a chah a. Lawngtlai District - bikah Polling Station awm tamin vote nei thei pawh an tam hle tih tarlangin, hemi avang hian fimkhur zual a tul hle a ni, a ti. India khua leh tui diktak   kum 18 tling tawh chauh Electoral  Roll-  a thun tur a nih angin, raltlante leh India khua leh tui nilo te thun palh  an nih loh nan a fimkhur turin a chah a ni.  India ram inrelbawlnaah India khua leh tui ten dikna chanvo an neih lian leh pawimawh tak chu Vote an neih hi a ni tih tarlangin, vote - nei theite hmaih loh a tul dawn hle a ti a. DEO chuan SIR neih turah hian electoral roll - a thara siam a ni dawn a, vote nei tawh tan pawn 'Enumeration Form'  hmangin E/Roll-  ah hming ziahluh dilna thehluh tur a ni a, hemi kawngah hian Political Party, Kohhran  leh mipuite pawh  ngaipawimawh tura chahin thawhpuiah a sawm nghal bawk. 

Pu H. Zonunmawia, ERO chuan SIR 2026 chu Electoral Roll feifai leh thianghlim siamna hun tha tak a ni tih sawiin, India khua leh tui diktak chauh E/Roll a thun a pawimawh dawn hle a ti a. E/ Roll - dik leh thianghlim tak nei tura theihtawp chhuah a nih tur thu tarlangin, Political Party - te leh khawtlang hruaitute  tha taka thawhpui turin a sawm bawk a ni. 

Pu Collin Hlychho, Election Officer, chuan SIR 2026 kalpui dan tur tlangpui sawizauna a nei a. ECI ruahmanna angin  ' Special Intensive Revision 2026' chu  May ni 20 atanga September Ni 6, 2026 chhungin Mizoramah kalpui tur a ni a. Qualifying date atan July Ni 1, 2026 niin,  May Ni 30- 28th June 2026 chhungin BL- O ten In tin tlawh chhuahna an nei anga, draft E/ roll tarchhuah hun tur chu July Ni 5, 2026 a ni ang. Final e roll tarchhuah hun atan  September Ni 6, 2026 ruat a ni. 

Lawngtlai District-  ah hian ERO - 3,  leh AERO - 7 an awm dawn a. BLO training - hi Lawngtlai, Chawngte leh Lungpher South ah te neih a ni ang. 

Vawiin thutkhawmah hian Political Party aiawh te, NGOs aiawh leh MJA, Lawngtlai te an tel thei a, zawhna leh chhanna hun hman nghal a ni a.  Pu Donny Lalruatsanga chuan lawmthu sawiin hun a khar.