3155/2024-2025

Khawzawl, dated 22nd November 2024: Vawiin chawhma dar 11:00 a.m khan DC Meeting Hall-ah naupang enkawlna hmun, Child Care Institution (CCI) te endik tura din, District Level Inspection Committee (DLIC) te chu an thukhawm a, Addl. DC leh DLIC Chairman ni bawk, Pu Lalfakzuala'n a kaihruai a ni.

He hunah hian District Child Protection Office (DCPO) atangin Pi C. Lalhmingsangi chuan meeting sawi hawnna a nei a, DLIC din chhan te, an hna hrang hrang te leh hriat tur tul dang a sawi hawng. Khawzawl district dinhmun te pawh sawi tel a ni a, hursualna, hleilenna leh harsatna hrang hrang lo tawk tawh naupang te tana tanpuina awm thei hrang hrang, child care institution (naupang enkawlna hmun) te, counsellor te leh facility awm hrang hrang te sawi lan a ni bawk. Inspection (endikna) neih hun atana criteria tur hrang hrang sawi ho bawk a ni. Chairman Pu Lalfakzuala chuan DLIC thutkhawmna rawn tel thei te hnenah lawmthu a sawi a, naupang him zawk nan, hrisel zawk nan leh thlamuan zawk nana thawk tur an ni tih hre reng chunga theihtawp chhuaha thawk turin a fuih bawk a ni.

He thutkhawmna neih zawh hian DLIC chuan hmun 3 - Kawnzar Observation Home, Exodus Boys' Home leh Little Wood Girls' Home te an tlawh a, thawktute nen inkawmna hun hmangin a hmunhma te, an hnathawh dan te leh an inenkawl dan te an endik a, naupang te nena inkawmna hun an hmang bawk a ni. DLIC hi Khawzawlah a vawi khat nana din a ni a, inspection hi quarterly (thla thum dan) in an nei ang.