2139/2023-2024

Khawzawl, 3rd October 2023: Vawiin khan Khawzawlah Mizoram Cleanliness Week 2023 hawnna hun DC Conference Hall, Khawzawlah neih a ni a. Pu Lalfakzuala, Addl. Deputy Commissoner Khawzawl District chuan khuallian niin he hun hi a hmanpui.

 Khawzawl District-a Cleanliness Week hawnna hunah khuallian Pu Lalfakzuala chuan Khawzawl khawpuiin kum 2022 chhunga Khawzawl Town in District Headquarters fai ber lawmman a lo lak tawh chu kuminah pawh chhunzawm leh tura theihtawp chhuah turin kalkhawmte a chah a. Faina atana pawimawh thil hrang hrang Bazar hmun, Zirna in, Sawrkar Pisa, damdawi in, Restaurant/ Hotel, vantlang inthiarna, Anganwadi, Traffic Point, Sub Centre leh Biak In te uluk lehzuala tih fai ni se, tin, heng bakah hian kawng sirah khawpui cheimawi thei tur pangpar leh plant phun uar lehzual turin leh a awmsate pawh mawi taka enkawl ṭheuh turin kalkhawmte a ngen bawk a ni. 

 He hunah hian Pu Lalthakima Chhangte, District Urban Development Officer, UD&PA Dept. Khawzawl District chuan India ram pumah Mahatma Gandhi piancham pualin Swachhata Hi Seva chu chawlhkar hnih chhung hman a nih hnuin Mizoram Cleanliness Week 2023 hman chhunzawm leh tur a nih thu a sawi a, hemi atan hian tha thlah lova theihtawp chhuah chhunzawm zel turin kalkhawmte a ngen nghal bawk a ni.

 Cleanliness Week 2023 hawnna hunah hian Khawzawl khaw chhunga Village Council hrang hrang aiawhte leh DC, UD&PA leh BDO Office-a thawkte an tel a ni. Vawiin faina hapta hawnna pual hian Khawzawl Zaingen Unit MUP chuan an huam chhungah faina hnatlang an nei a, member thahnem tak an thawk chhuak a ni.