No.801/2021-2022

Dated Khawzawl, the 3rd June, 2021: Vawiin chawhma khan District Level Committee on Green Mizoram, Khawzawl District chu an Chairman Pu Zothanmawia, District Bawrhsap hovin DC Conference Hall-ah Green Mizoram Day 2021 hman dan tur relin an thukhawm.

He hunah hian Pu Lalthankima, DFO Khawzawl Wildlife Division chuan report pein, nikum Green Mizoram Day-a thing phun 2248 zinga 1007, za zela 44.8 te an nung that thu a sawi a. Kumin ruah tui tlak har vangin thingphun nungsa engemawzat thi a hriat a ni, a ti bawk.

Meeting chuan kumin Green Mizoram Day chu June ni 11, 2021 chawhma dar 10:30 ah DC Pisa tualah hawnna neiha tan nise, he hunah hian kangmei ven kawnga ti tha khaw pathumte leh hla thu inphuahsiaka titha mi pathum (3) te hnenah lawmman pek ni se tiin a rel a. Hawnna hun hman zawhfel hnu hian DC Complex leh Mualvawm field chhehvelah sawrkar department hrang hrang, Sub-Hqrs. YMA leh Sub-Hqrs. MHIP atanga thingphun tura ruat bik ten sawrkarin Covid-19 inkaihhruaina a siamte zawm chungin thingphun hnatlang kalpui se tih a ni bawk.

Thing phunna tur hmunhma lo enfiaha a hungna tur mau leh leitha hman turte ngaihtuah turin DFO Khawzawl Wildlife Division chu ruat a ni a, thing tiak phun turte chu a hawnna hmunah hian lo chhawp lawk vek nise tih a ni. Ruahman dan chuan Department hrang hrang leh mimala thingtiak phun duhte tan Pu Lalremthanga, Range Officer Khawzawl hnenah in report-a thingtiak lak tur a ni a. Hetiang bawk hian R.O Kawlkulh, Khawhai leh Rabung-te pawhin an huamchhung theuhah thingtiak an sem chhuak dawn bawk a ni.