294/2022-2023
Khawzawl, the 26th April, 2022: Mizoram sawrkar flagship programme Socio-Economic Development Policy (SEDP) kalpuina kawnga District Level-a thuneitu sang ber District Level Committee on SEDP Khawzawl District chu vawiin khan District Bawrhsap Pu C.C. Lalchhuangkima hovin DC Conference Hall-ah an thukhawm.

District Bawrhsap Pu C.C. Lalchhuangkima chuan kalkhawmte chu District Level leh Village Level Committee on SEDP pawimawhna leh tih tur te a hrilhfiah a. Sawrkar flagship programme pawimawh tak hnuaia trade hrang hrang dawng tura thlan ten hlawhtlinna an chan ngei theih nana theihtawp chhuaha hmalak a pawimawh thu a sawi bawk.

He hunah hian Village Level Committee on Socio-Economic Development Policy a tel tur member-te kalkhawmte chuan uluk taka sawihoin an thlang nghal a. Line Department hrang hrangte hnen atangin an hmalak tawhna report tawi ngaihthlak a ni a. Department hrang hrang 5 hnen atangin report hi ngaihthlak a ni a. Kalkhawmte chu hamthatna dawng tur beneficiary thlan chungchanga hriat tur pawimawhte hrilhhriat nghal an ni bawk.