296/2026-2027

Dated Khawzawl, the 27th April, 2026 : Vawiin khan Bawrhsap Pu K. Vanlalthiana, NCORD Chairman ni bawk kaihhruaiin DC Conference Hall-ah April thla atan Khawzawl District NCORD meeting neih a ni a. NCORD meeting hmasaa thurel bawhzuinate thlir let niin, hma lak zel dan tur sawiho a ni.

Bawrhsap Pu K. Vanlalthiana chuan sawrkarin a phut angin Khawzawl district-a thla tin NCORD meeting an nei thei chu lawmawm a tih thu a sawi a. Ruihhlo do leh drugs man kawngah Khawzawl police leh END-te thawhrimna chu fakawm a tih thu sawiin, an thahnemngaihna leh inpekna avangin lawmthu a sawi a. Mizoram district hrang hrang zingah Khawzawl chu kuhva rah tawlhruk man tam ber an ni tih tarlangin, kuhva rah tawlhruk hian kuthnathawkte eizawnna a tihbuai avangin a do kawngah theihtawp chhuah zel a pawimawh thu a sawi.

Khawzawl SP Pu F. Lalbiakzauva, NCORD Member Convener ni bawk hnen atangin Khawzawl district chhunga drugs man dan report ngaihthlak a ni a. Kumin 2026-ah hian ND&PS case 7 ziahluh tawh niin, heng kaihnawihah hian mi 10 man an ni a, Heroin gram 329, Rs. 65,80,000 hu leh Meth  kg 13.87, Rs. 11,09,60,000 hu man a ni tawh a. Mizoram Liqour (Prohibition) Amendement Act, 2025 hnuaiah case 11 ziah luh tawh ni bawkin, NGO-te nen ruihhlo do kawngah thawhhona tha tak an nei tih SP chuan a tarlang.

Zuk leh hmuam do kawnga hmalaknate pawh ngaihthlak niin, zirna in bul hnaih, 100 yards (feet 300) chhung chu zuk leh hmuam fihlimna (Tobacco-Free Zone) a ni a, he hmunah hian vaihlo thil hralh leh hman khap tlat a nih angin, Khawzawl district chhunga school hrang hrangahte 100 yard chin chhinchhiana ‘yellow line’ siam a ni a. April thla chhung hian Khawzawl Vengsang Presbyterian Kohhran NPSS-ah ruihhlo do awareness neih a ni dawn a, May thla-ah Biate khua-ah awareness nei tura ruahmanna siam a ni bawk. 

Khawzawl district chhunga drug-free village (ruihhlo awm lohna) atana thlan Tlangmawi khua chu ruihhlo lakah an fihlim ngei em tih endikna (joint inspection and verification) pawh May thla-a neih tura rel a ni. Khawzawl district hi Mizoram chhunga NCORD dedicated helpline number nei awm chhun a ni a, a number chu 8119080266 niin, hemi number-ah hian mipuite chu ruihhlo kaihnawih thil reng reng report tura ngen an ni.