297/2026-2027

Kolasib, 27th April, 2026: Vawiin chawhnu khan DC Conference Hall, Kolasib-ah Kolasib Deputy Commissioner leh Principal Census Officer ni bawk Pu H. Dolianbuaia hovin Census of India 2027 kalpui mek chungchangah Mizoram Journalists' Association (MJA) Kolasib District member-te nen Press Meet neih a ni.

DC Pu H. Dolianbuaia chuan Census pawimawhna leh kalphung sawifiahin, hei hi India ram puma chhiarpui (census) vawi 16-na tur a nih thu leh, India-in zalenna a hmuh hnua vawi 8-na tur a nih thu a sawi. Kuminah hian he chhiarpui hi hlawm hnih (Phase I leh Phase II) a thenin kalpui a ni dawn a. Phase I (House Listing leh Housing Census) chu April 16 atanga May 15 chhungin neih mek a ni a. Phase II (Population Enumeration) chu kum thar February 2027 atanga neih tan a ni ang. Phase II ah hian mipuite dinhmun chipchiar zawk - eizawnna, zirna, pem lut leh chhuak (migration), naupiang zat (fertility) leh thil dangte lakkhawm a ni dawn a ni.

Chhiarpui hlawhtling taka kalpui a nih theih nan thawktu tur chi hrang hrang ruat fel an nih tawh thu leh uluk taka training pek an nih thu a sawi a. Chhiarpui neih mekah harsatna tlem a zawng a awm thu sawiin DC chuan, sakhaw thil leh chhan hrang hrang vanga chhiarpui a tel duhlo an awm zeuh thin thu a tarlang a. Mahse, census chu mihring zat leh dinhmun chhiarna mai a nih a, sakhua leh thil dangte nena inzawmna a neih loh avangin hlauhthawn tur a awm loh thu mipuite hriatthiam tira hrilhfiah zel turin thawktute chu chah an nih thu a sawi bawk.

Assam leh Mizoram ramri chungchanga harsatna awm, Google Map-a Mizoram ram thenkhat Assam anga a lang chu Census Directorate-ah thlen a nih tawh thu leh an chhanna nghah mek a nih thu DC chuan a tarlang a. DC chuan chanchinbumite chu Census pawimawhna mipuite hnena thehdarh tur leh, thu dik leh rintlak thehdarh thin turin a ngen nghal a ni.

Press Meet-ah hian chanchinbumite zawhna hrang hrangte chu DC leh official dang ten an chhang nghal a ni.

He hunah hian Kolasib DC bakah , Addl. DC Pi B. Malsawmtluangi, Pu H Lalramliana , Kolasib SDO Sadar, Kawnpui SDO Dr. Doris Lalrinawmi leh Bairabi SDO Pu Chinlianmanga te leh District Information & Public Relations Officer leh MJA Kolasib members te an tel a ni.