No.7619/2020-2021  

Vawiin chawhnu dar 1:00 khan Khawzawl District Task Force on Covid-19 Vaccination chu an chairman Pu Zothanmawia, Deputy Commissioner hovin DC Conference Hall-ah an thukhawm a, Khawzawl District chhunga Covid-19 vaccine pekchhuah tawh dan thlirhona leh Vaccination kalpui zel dan tur an sawiho a ni.

District Immunization Officer Dr. Albert Lalhminghlua tarlan dan chuan tun dinhmunah Khawzawl District-a Healthcare worker 140 hnenah Covid-19 vaccine dose khatna pek a ni tawh a. Naktuk February Ni 25 atanga 27, 2021 chhungin Frontline worker mi 900 chuang hret hnenah vaccine dose khatna pechhuak tura ruahmanna kalpui mek a ni. 

Pu K. Lalkulhpuia, Programme Officer, NSS, Khawzawl Govt. College-in powerpoint presentation hmangin Covid-19 vaccination chungchanga hriattur pawimawhte a tarlang a. Zau zawka thehdarh a nih theih nan hmalak nise tiin Task Force chuan a rel bawk. 

Mi hrisel pangngai, Covid-19 dawng thei tura CoWin portal a hming ziahluh tawhte chu Vaccine la theuh turin District Task Force on Covid-19 Vaccination chuan a sawm a ni.