No.7620/2020-2021

Vawiin khan Information & Public Relations Minister Pu Lalruatkima chuan Commissioner and Secretary Pu Sangdingliana, IAS thlahna hun I&PR Auditorium-ah a hmanpui.

Minister Pu Lalruatkima chuan Kum 60 thlenga sawrkar tana hnathawk thei a Pu Sangdingliana a awm chu a lawmpui thu a sawi a. Sawrkar tana mi tangkai tak leh Department hmalakna tur leh enkawl chungchanga thurawn pe tu a nih thu a sawi a. I&PR Department in Secretary hna a chelh chhungin kawng tam takin hma a sawn a; chung zingah chuan Mizoram pawnah Press Tour Vawi li lai lo buatsaih a ni tawh a, chu mai bakah Mizoram atanga a vawikhatna atan Bureau of Parliamentary Secretariat and Training Institute (BPST)-ah Mizoram Information Service Officer-te leh chanchinbu mi ten training New Delhi-a an neih hi a chhuanawm tak zet zet a ni, a ti a. 

Minister chuan COVID-19 hripui len zual laiin I&PR Department in hna a thawk hlawk hle a, sawrkar thupuan chhuah pawimawhna leh sawrkar thupuan chhuah nghah chungchangah mipuiten a pawimawhna an hre thar a ni, tiin a sawi a. Sawrkar-in a hna thawkte posting-a a dahna apianga awm zel turin leh thahnemngai taka thawk zel turin thawktute a fuih thar leh a ni.

I&PR Department Director Pi Lallianpuii’n thlahna thu tawi sawiin, thil pek Pu Sangdingliana hi a hlan a. Commissioner thlahna hun hi I&PR Joint Director Pu C.Lalnunkima’n kaihruaiin, I&PR  Deputy Director Pi PB Lianthangpuii’n lawmthu sawiin he hun hi a khar a ni.

Pu Sangdingliana IAS (AGMUT Cadre, 2005) hian I&PR Department bakah LAD, DC & MA Department a chang mek a, February ni 28 hian superannuation in a chhuak ang.