580/2023-2024

Khawzawl, the 25th May, 2023: Thla thar June ni 5 a World Environment Day lo thleng tur puala Environmental Day hman mekah tukin khan Khawzawl khawpui chhunga High School leh Higher Secondary School zirlaiten Khawzawl khawpui chhungah khawlai thianfaiin hnatlang an nei.

Hnatlang neih hma zing dar 6:30-ah Khawzawl DEO Office-ah hun tawi hman a ni a. Hetah hian DEO Pu Lalsikula chuan Environment Day lo thleng tur puala Environmental Week hman mekah hian zirlaite chu thing leh mau leh nungchate pawimawhnate hria a, Environment pawimawhna leh humhalh a tulziate hre thar turin a chah a. Faina leh thianghlimna nunpui a pawimawh tih pawh sawiin, Khawzawl leh Khawzawl District hi faina lamah Mizoramah hmahruaitu kan ni a, zirlaite pawhin faina kan nunpui a, midangte zirtirtu nih theuh kan tum a tul a ni, a ti a. Zirlaite'n khawlai tifaia hnatlang an nei tur chu lawmawm a tih thu sawiin, tha taka hnatlang nei tura duhsakna a hlan hnuah hnatlang turte hi a vailiam a ni.

Tukin hnatlangah hian zirlai 350 chuang an thawk chhuak a, Khawzawl khawpui chhunga kawngdung leh khawlai hmun langsar laia bawlhhlawh tlate an chhar khawm a ni.