581/2023-2024

Champhai, the 25th May, 2023: Assembly of God (AG) Kohhran hnuaia kalpui, Champhai Bible College (CBC) din champhaphak vawi 1-na 1st Foundation Day lawmna, CBC Chapel Hall, Tlangsama hman chu vawiin chawhnu dar 3 khan Law & Judicial Minister Pu T.J. Lalnuntluanga'n khuallian niin a hmanpui.

Khuallian Pu T.J. Lalnuntluanga chuan Champhai Bible College-in din a nih atanga kum khatna hmel a hmu thei chu a lawmpui thu sawiin, thalai rual thahnem takin Pathian thu zir duhna neia an tuipui chu ropui a tih thu a sawi a. AG Kohhranin Bible zirna College changtlung tak Champhai hmun ngeia an kalpui chu fakawm a tih thu sawiin, hei hian a tha lam zawngin nun a kaihruai thei dawn a ni tiin, hmasawnna tur tam tak awmte pawh ngaihven zel a tul thu pawh a sawi bawk.

Pathian ringtu ram leh hnamte chawimawia an awm thin thu tarlangin, ram leh hnam dinchhuahna chu Pathian rinnaah chauh a innghat a ni, a ti a. Mizo hnahthlak hnam hrang hrangte mangan nikhuaa tlankhawmna leh innghahna chu an inpui Mizoram a nih thu pawh sawiin, inngeih leh lungrual taka chenho thiam a pawimawh a ni, a ti a. Chanchin tha avangin Mizoramin hma a sawn a, kan thlahthlam ni chu kan tlakhniam tanna ni tur a ni, a ti a. Kalkhawmte chu Biakin leh Pathian thu zahawmna vawngnungtu nih tum tur leh, a chhe zawnga hmangtu nih tum lo turin a chah a. Zirlaite chu entawntlak nun nei turin a fuih a. CBC chu chanchintha hril kawnga thawhhlawk tak a nih theihna turin an kalzelna turah duhsakna a hlan a ni.

Champhai Bible College Foundation Day lawmna hun hi Pu K.Lalrammuana'n kaihruaiin Tual Upa TBC Rokunga'n hunserh a hmang a. Rev. Tuangzapau, President, Champhai Bible College-in kalkhawmte lawmna thu a sawi a. Speaker Pastor MC Vanromawia'n thu a sawi bawk.

Champhai Bible College (CBC) bultan nan hian May ni 25, 2022 khan interview neih niin, Bible zir tur mi 30 chuang inziaklutin mi 22 in kum khatna an zir zova, kumin bikah hian mi 14 an luh belh leh bakah In lam atanga kal Day Scholar 2 an awm tel bawk a ni.

Attachment

  • Loading attachment...