MRB Khawzawl Branch buatsaihin Khawzawl Vengthar Branch MHIP Member te tan nizan khan Khawzawl Vengthar Branch YMA Committee Room-ah  Financial Literacy Campaign an buatsaih.

He hunah hian Branch Manager  Pu H. Lalrammawia chuan Khawzawl mipuite atanga deposit an dawnkhawm chu mipuite hmasawnna turin a tangkai thei ang berin Loan a an pekchhuah leh thin thu a sawi a . State pum ang pawhin ram hmasawnna atana Loan pe chhuak tha a CD Ratio sang berte zingah Mizoram Rural Bank hi a awm thu a sawi bawk. Pu H. Lalrammawia chuan Central Scheme pawimawh mipuite ni 100 inhlawhna, MGNREGS chu Mizoram pumah Mizoram Rural Bank in 95% lai an khawih phak a, Khawzawl RD Block huamchhungah pawh Village Council 20 a NREGS sum anmahniin an khawih tih a sawi lang a, mipuite leh Sawrkar nen thawhhona tha tak an neih chu lawmawm a tih thu sawiin, MHIP Member kalkhawmte Job Card neituten Ni 100 inhlawhna chungchunga Vantlang rorelna (Gram Sabha) VC ten an koh thin chu ngai pawimawh a, kal ngei ngei thin turin a chah a ni.

MRB Khawzawl Branch hian tun dinhmunah pawisa Deposit hi cheng Vaibelchhe 18 a awm laiin Loan an pek chhuah zat chu vaibelchhe 15.36 lai a tling a ni. MRB Khawzawl Branch hian Septermber, 2016 atanga tun thleng hian Kohhran hrang hrang-ah a remchan dan ang zelin  Loan cheng vaibelchhe 2.50 (Vaibelchhe 2 leh nuai 50) an pe chhuak tawh bawk a ni

He hun hi Branch MHIP President Pi R. Lalthlengliani'n a kaihruai a. Domestic Violence Service Provider Pi Lalthlamuani Ralte, SI*AR Newspaper Editor ni bawkin hmeichhia te dikna chanvo te leh Domestic Violence chungchanga hriat tur pawimawh te a sawi a. MHIP Adviser Pu TBC. Ramfangzauva'n MHIP Member te fuihna thuchah a sawi ve bawk. Campaign-ah hian MHIP Member 70 chuang tel theiin Bank kalphung leh Bank kaihhnawih a hriat tur tul hrang hrangah zawhna leh chhanna hun buatsaih a ni bawk. Rural Bank, Khawzawl Branch in Deposit an hmuh tlingkhawm atanga  Loan an pek chhuah CD Ratio chu 80% lai a tling a, hei hi Reserve Bank of India lamin CD Ratio Norms an siam a khum a ni.