Mizoram sawrkar buatsaih I&PR Department kaltlanga Press Tour neia Sikkim State a thang mek Mizoram Journalist Association member 10 leh anmahni hruaitu I&PR Department Official te chuan nimin khan Sikkim sawrkara hotu lian pawimawh thenkhat an kawm.

Press Tour Team  hian nimin chawhma lam khan Sikkim Tashing Secrectariat tlawhin Chief Secretary Pu A.K Strivastava chu a Pisa-ah an kawm a. Inkawmhona hun hlawkthlak tak hman niin Chief Secretary chuan Mizoram chu a lo hmelhriat tawh thin thu leh Sawrkar laipui hna tul te endikin a kal thin tawh thu a sawi a. Rambuaiin hun rei tak a tihbuai hnu ah State ralmuang tak anni thei chu ropui a tih thu sawiin India ram State dang ten an dil nawn fo pawh a an hmuh ve theihloh "Peace Bonus" dawng thei hiala an awm bik chu a lawmpui rualin thik lek lek thin tih a sawi a, Mizoramah inthlanna muanawm taka neih ani thin chu ropui a tih thu leh zirchian tlak ni a a hriat thu a sawi a, Mizorama ruahtui dahkhawlna an siam dan te a taka a hmuh thu leh entawn tlak a tih thu a sawi a, inkawmhona hun tha tak hman a ni.

Chawhnu lamah Press Tour Team te hian I&PR Department Office tlawh lehin Secretary Pi Sherap Shenga, Director Pi Parinita Lama leh Official dangte nen IPR Conference Hall-ah inkawmhona hun an hmang a. He hunah IPR Sikkim hmalakna leh hnathawh dan tlangpui Secretary hnen atanga ngaihthlak a ni a. Pu Andrew H Lalremruata, Media Officer in I&PR Mizoram hmalakna leh hmachhawp te a sawi zau bakah inthlanna muanawm tak neih anih theihna tura  Mizoram People's Forum hmalaknate  a sawifiah a, Mizoram Sawrkar hmalaknain Press Enclave sak tura ruahmanna kalpui mek anih thu  leh Sawrkarin Journalist te hamthatna chi hrang hrang a ruahman sak te a sawi bawk a.  Sikkim I&PR hotute chuan tha an tih thu sawiin bawhzui ve thuai an tum thu an sawi a ni. Sikkim sawrkar hian Chanchinbu mi zinga a thawk tha te pualin kum tin award an siam sak bakah tunah hian accredited journalist te tan pension scheme an duang mek a reilote ah hman tan ani dawn a ni. Chanchinbumiten zawhna  leh an hriat duhte zawtin  hun hlawkthlak tak hman a ni a, inkawmhona hman zawh hnu hian I&PR Sikkim inzarpharh dan leh Department hnalak dan te, Department hnuaia bung tinte hnathawh dan te en a zirchianna neih ani bawk.

Ruahman dan chuan Press Tour Team hian vawiinah Sikkim Chief Minister leh I&PR Minister te an kawm bakah Sikkim Press Club tlawhin Sikkim journalist te nen inkawmhona hun an hmang ang a, sawrkar hmun pawimawhte an tlawh ang a,  naktukah Nathu La an tlawh bawk ang.

Attachment

  • Loading attachment...