Mizoram Chief Minister Pu Zoramthanga, Horticulture changtu ni bawk chuan vawiin khan Aijal Club-ah hmar chhak bial Mission for Integrated Development of Horticulture (MIDH) meeting-a hman pui. North East State hrang hrang atanga Horticulture Officer te intawhkhawmna Regional Group North Eastern Region on MIDH meeting-ah hian Arunachal Pradesh, Assam,Manipur, Meghalaya, Mizoram, Nagaland, Sikkim leh Tripura atangin official rualte an kalkhawm a. Sawrkar Laipui MIDH-a Assistant Commissioner Pu SK Kaul pawh he meeting-ah hian a tel a ni.

Chief Minister Pu Zoramthanga chuan ei leh bara intodelh turin sector pawimawh tak tak pathum- primary, secondary leh tertiary a awm a, primary sector chuan leilung atanga tharchhuah te a huam a, North East state te tan chuan leilung atanga thar chhuah ngei primary sector-a innghah hi a daih reiin a tlo ber a ni, a ti. Hlawk zawka tharchhuah ti ral tur chuan kawng zawh tur pawimawh pali a awm a, chungte chu thar chhuah tihpun (production), a phurhna ngaihtuah (transportation), tharchhuah sawngbawl (processing) leh hralh chhuahna tur market ngaihtuah te a ni, a ti a. Pawn lama thawnchhuah hmain State chhunga cheng mipuiten eng thlai hi nge an mamawh ber tih hria a, chumi hawi zawnga tharchhuah her rem chu pawimawh a tih thu a sawi.  Chief Minister chuan mau (bamboo) chungchang sawiin mau hmanga sumdawnna hi Mizoram chauh ni lo, hmar chhak state dangte tan pawh economy siam thatna kawng pawimawh leh hlawk tak nia a hriat thu leh ram dangte tan pawha entawn tlak khawpa hma lak theihna nia a hmuh thu meeting-ah hian a sawi a. State dang aiawh palaite pawhin hemi kawngah an ngaihtuahna seng thar turin a sawm a ni.

Meeting hawnna inkhawm hi Horticulture Secretary Pu Rodney L Ralte chuan a kaihruai a. Dr Namita Bhuyan, Horticulture Consultant, Govt. of India chuan MIDH chungchang presentation a nei a. Mizoram sawrkara Horticulture Director Dr. Elizabeth Saipari’n lawmthu sawiin meeting hawnna inkhawm hi tih tawp a ni. Chawhnu lamah technical session neih niin hei hi MIDH Asst. Commissioner Pu SK Kaul chuan a kaihruai a. March ni 31, 2020 hnu lama  North East State paruka Revamp MIDH kalpui dan tur te, MIDH programme an hman mekah harsatna an tawh dan leh hlawhtlinna an hmuh te sawiho in chak zawk leh hlawk zawka he Mission kalpui dan tur hi an sawiho a ni.

Mission for Integrated Development of Horticulture (MIDH) hi Centrally Sponsored Scheme (CSS) niin horticulture in a tuam thei leh thlai, pa (mushroom), pangpar, mau, coconut, leh a dangte a ramin hma a sawn theihna tur hmalakna a ni a. MIDH hnuaiah hian Government of India chuan North East State pariatte leh Himalayan State ah te hna thawhna tur sum za zela 90 a tum sak a ni. MIDH hi sub-scheme ah then darh leh niin National Horticulture Mission (NHM), Horticulture Mission for North East & Himalayan States (HMNEH), National Bamboo Mission (NBM), National Horticulture Board (NHB), Coconut Development Board (CDB), Central Institute for Horticulture (CIH) te a awm a. India ramin nasa takin horticulture thlai thar chhuah kawngah hma a sawn phah a ni.