4362/2025-2026

Dated Khawzawl, the 9th February, 2026: Vawiin chawhnu dar 1 khan Zaingen YMA hall-ah Khawzawl Bawrhsap Pu K. Vanlalthiana, Chairman, District Level Fire Prevention Committee hovin Fire Prevention Week 2026 hman a ni.

Khawzawl bawrhsap Pu K. Vanlalthianan thusawiin Khawzawlah kangmei a chhuah nasat zia thu sawiin kangmei chhuak tam lutuk chu kan tan ho chuan tih kiam theih a nih thu a sawi a, Ram kan chhan tam zawk hi chu inthlah dah vang leh kut hlei vang a nih thute sawiin, ram ti kangtu chu hrem zel tur an nih thu kuminah chuan na tak kangmei tichhuaktute chungah dan anga hma lak a nih tur thu a sawi a ni. Kan rama nungcha te chenna leh tui thianghlim in tur min pe tu ram ngaw te chu kang mei lakah humhalh a tul ziate sawiin chumi atan chuan a te ber atanga a lian ber thlenga kan pawimawh thu leh ram hmangaihna nena kan zavaia kan tana kan thawhho a tul a ni a tiin Fire Prevention Week 2026 chu a hawng a ni.

Pu Lalnunthanga, DFO & Member Secretary chuan report pein District Level Fire Prevention Committee chuan Khawzawl District-ah kangmei chhuak tam lutuk chu a that loh zia leh a ven dan inzirtir nana hma an lak zel dan turte sawiin awareness te pawh a tam thei ang ber neih tum a nih thu te a sawi a, District Level Fire Prevention Committee hnuaia intihsiakna neih tak Middle School level Poster insiam siak leh Reels insiam siak  result puanna leh lawmman semna te a kaihruai nghal bawk a ni.

He hunah hian Pu PC. Rosiama, President, Sub-Hqrs. YMA, Khawzawl leh Pu Liantluanga Chohte, E.E, PHED te hnen atangin thusawi ngaihthlak a ni a, Siampuii Ralte in kalkhawmte zaiin a awi a, District chhunga Department hrang hrang hotute, VC aiawhte, NGO leh MJA te aiawh bakah School leh College zirlaite an tel a, Pu Hrangchungnunga, RO, Khawzawl Forest Range chuan lawmthu sawiin hun a khar a ni.