No.920/2021-2022

Khawzawl, the 11th June, 2021: Vawiin chawhma khan Green Mizoram Day pualin District Level Committee on Green Mizoram Day (DLCGMD) buatsaihin Khawzawl-a sawrkar department hrang hrang, Village Council leh NGO ten Mualvawm Park, Khawzawl Darngawn-ah thingphun hnatlang an nei.

DC Pisa tualzawla hawnna inkhawm tawi buatsaihah Pu Zothanmawia, Deputy Commissioner & Chairman, DLCGMD chuan khuaw lum zual zel leh tuihna tlem zelah  ramngaw humhalh mai piah lamah ramngaw siamte, tuihna leh nungcha humhalhte, thingphun uarte a tul hle tawh a ni, a ti a. Thing phun mai duhtawk lova, thingphunte a nung tha em tih ngaihven zui a pawimawh thu sawiin, DLCGMD pawhin thing phun hrim hrim bakah leitha leh a hungna tur a ruahman tel chu lawmawm a tih thu a sawi bawk.

Pu C. Lalthankima, DFO (Wildlife) & Member Secretary, DLCGMD chuan Green Mizoram Day, 2021 Inaugural Function hi a kaihruai a. Green Mizoram Day pual hian Khawzawl District chhunga phun turin ni tukin thlengin thing tiak 2,219 (sanghnih zahnih leh sawmpakua) semchhuah a nih tawh thu a tarlang a ni.

Khawzawl District chhunga kangmei ven kawnga khua tithate hnenah lawmman sem niin, lawmman pakhatna latu Vankal Village Council chuan pawisa fai Rs. 50,000/- (Cheng Singnga) an dawng a. Pahnihna Hmuncheng VC in Rs. 30,000/- (Cheng Singthum) dawngin, pathumna Khawzawl Darngawn VC in Rs. 20,000/- (Cheng Singhnih) an dawng a ni.

Green Mizoram Day, 2021 puala hlathu inphuahsiak lawmman pawh sem niin, Pi Jenny Hauzel, Khawzawl Vengthar chuan 'Vul zel ang che'  tih hla hmangin lawmman pakhatna a la a. Pi H Lalbiakengi, 'A chuai zo ta' leh Pu Rammuanthanga, 'A pawi vawng vawng' tih te chuan lawmman pahnihna leh pathumna an la bawk a ni.

Hawnna hun hman  zawhah hian Mualvawm Park-ah Khawzawl-a sawrkar department hrang hrang te, District VC Association, YMA, MHIP leh NGO dang aiawh ten thingphun hnatlang neih zui a ni a, department pakhatin thing tiak pahnih theuh an phun a ni.